Հանրության կողմից ընկալված եմ համարում կառավարության տնտեսական հեղափոխության բանաձևը. Փաշինյան

Կառավարության տնտեսական հեղափոխության բանաձևը Հայաստանի հանրության կողմից ընկալված է. կառավարության նիստում հայտարարեց ՀՀ վարչապետ Նիկոլ Փաշինյանը՝ ավելացնելով, որ կառավարությունը պետք է ընդունի կառավարության ծրագրից բխող միջոցառումների ցանկը, որը, սակայն, պետք է տարանջատվի հեղափոխությունը խթանող միջոցառումների ցանկից:

Նա հանձնարարեց վերանայել բոլոր ներդրումային առաջարկները, գույքագրել դրանք, բացահայտել ներդրումների համար առկա խնդիրները, կենտրոնացնել տեղեկատվությունը տնտեսական ներդրումների և զարգացման նախարարությունում:

Վարչապետը հանձնարարեց նաև կարգավորումների պարզեցման քարտեզ կազմել, ջրի, գազի հասանելիության հարցը լուծել, ներդրումային հայկական հիմնադրամի ստեղծման աշխատանքն արագացնել:

«Մեծ թափով սկսել վերամասնագիտական ուսումնական կենտրոնների ստեղծումը, ակտիվացնել և զարգացնել այն բոլոր ուսումնական կենտրոնները, որոնց նպատակը մարդկանց բիզնես հմտություններ սովորեցնելն է»,- հանձնարարեց վարչապետը:

Գյուղատնտեսության ոլորտին ուղղված հանձնարարականներ տալով`  նա ընդգծեց, որ կաթիլային ոռոգման, գյուղատնտեսական նոր տեխնոլոգիաների ներդրման աշխատանքն ավելի արդյունավետ պետք է լինի: