Տնտեսական հեղափոխության ծրագիրը տեսանելի չէ. Կարեն Սիմոնյան

Իհարկե, ցանկալի է, որ կարճ ժամանակահատվածում հասնենք  տնտեսական փոփոխությունների, բայց այսօրվա կառավարության ծրագիրը թույլ չի տալիս նման եզրակացություն անել, Yerkir.am-ի հարցին, թե հնարավո՞ր է քաղաքական հեղափոխության մեխանիզմներով նաև տնտեսական հեղափոխություն անել, այսպես պատասխանեց «Լուսավոր Հայաստան» խմբակցության պատգամավոր Կարեն Սիմոնյանը:

«Կարդալով այն դիրքորոշումը, որ ունի կառավարությունը տարբեր ոլորտների համար, տեսնելով տնտեսական թվային ոչ լիարժեքությունն ու թվերով ոչ հագեցվածությունը` տեսնում ենք, որ տնտեսական հեղափոխության ծրագիրը, որպես այդպիսին, չի երևում:  Մյուս կողմից, սակայն, կառավարության ծրագրի մեջ  չպետք է լինեն միայն ցուցանիշներ, պետք է լինի հստակ դիրքորոշում, օրինակ` ազգային անվտանգության, պաշտպանության քաղաքականության հետ կապված, որը թվերով չափելի չէ, այլ նկատելի է որպես արդյունք»,- մեկնաբանեց Սիմոնյանը` ավելացնելով, որ կառավարությունը խուսափում է ներկայացնել որևէ թվական աճ ամենատարբեր մոտեցումների վերաբերյալ:

Ըստ նրա` նշված է նաև, թե ծայրահեղ աղքատությունը 2023-ին լրիվ վերացվելու է, ինչը խոսում է ծրագրի` հավակնոտ լինելու մասին, և եթե այն հաջողի, ապա միայն դրական փոփոխություն կբերի հասարակությանը: