Ղրղզստանը չի բացառում երկրորդ ռուսական ռազմաբազայի տեղակայման hավանականությունը. ՌԴ-ում երկրի դեսպան

ՌԴ-ում  Ղրղզստանի նոր դեսպան Ալիկբեկ Ջեքշենկուլովը չի բացառում, որ Ղրղզստանի տարածքում կհայտնվի ևս մի ռուսական ռազմաբազա: Այդ մասին նա ասել  է ТАСС գործակալությանը տված հարցազրույցում: 

Դեսպանի խոսքով՝ «Կանտ» ավիաբազան կարևոր կայունացնող գործոն է ամբողջ Կենտրոնական Ասիայի համար, հենց այդ պատճառով էլ  Բիշքեկն աջակցում է դրա ամրապնդման առաջարկին: Այդ ամենի հետ մեկտեղ՝ նոր ավիաբազայի տեղակայումը նույնպես բացառված չէ:

Ըստ դեսպանի` պետք է հաշվի առնել նաև տարածաշրջանային մի շարք առանձնահատկություններ՝ ինչպես սոցիալ-տնտեսական, այնպես էլ ժողովրդագրական: Նա նշել է, որ այսօրվա դրությամբ` մարտահրավերները հիմնականում գալիս են Աֆղանստանի տարածքից. ԻՊ-ի գրոհայինների տեղափոխություն է տեղի ունենում, և նրանք կարող են հայտնվել հարևան Տաջիկստանում, այնուհետև նաև իրենց տարածքում:

«Դրա հետ կապված` երկրորդ ռազմաբազայի բացման անհրաժեշտության հարցը Ղրղզստանի հարավում գտնվում է երկու պետությունների ղեկավարության ուշադրության կենտրոնում: Կարծում եմ` հարցը կարող է քննարկվել մարտ ամսին կայանալիք` երկու երկրների նախագահների հանդիպման ժամանակ», - ասել է Ջեքշենկուլովը: