ԵԽ-ն կոչ է արել Հայաստանի իշխանություններին պաշտպանել քրեական հանցագործության մեջ մեղադրվող ցանկացած անձի անմեղության կանխավարկածը

Եվրոպայի խորհրդի մարդու իրավունքների հարցերով հանձնակատար Դունյա Միյատովիչը հրապարակել է 2018թ․-ի սեպտեմբերին Հայաստան կատարած այցի ամփոփիչ զեկույցը։

Հանձնակատար Միյատովիչը ողջունել է այն քայլերը, որոնք իրականացվել են ճշմարտության հաստատման և 2008 թվականի մարտ ամսին տեղի ունեցած «բռնի գործողությունների ժամանակ զոհերի համար պատասխանատուներին դատական կարգով հետապնդելու ուղղությամբ»։

Միևնույն ժամանակ նա ընդգծել է, որ կարևոր է այս գործընթացն իրականացնել զգուշորեն՝ խստագույնս հավատարիմ մնալով իրավունքի գերակայության, դատական անկախության, թափանցիկության և արդար դատաքննության երաշխավորման սկզբունքներին, որպեսզի բացառվի ենթադրյալ վրեժի քաղաքականության կամ ընտրովի արդարադատության որևէ մեղադրանք:

Նա նաև կոչ է արել Հայաստանի իշխանություններին պաշտպանել քրեական հանցագործության մեջ մեղադրվող ցանկացած անձի անմեղության կանխավարկածը և հասարակական դիսկուրսում խուսափել բևեռացնող, հրահրող ձևակերպումներից, ինչը, ըստ Հանձնակատարի, խոչընդոտ է համախմբված հասարակություն ձևավորելու և անցյալի պառակտումները հաղթահարելու համար:

ԵԽ հանձնակատարը անդրադարձել է նաև Հայաստանում կանանց իրավունքներին՝ ընդգծելով, որ կանայք բավարար չափով ներգրավված են որոշումների ընդունման գործընթացում:

Միյատովիչը նաև առաջարկել է Հայաստանի իշխանություններին ընդունել սեռական կողմնորոշման և գենդերային ինքնության խտրականության դեմ համակողմանի օրենք, ինչպես նաև կոչ է արել քայլեր ձեռնարկել Հայաստանում ԼԳԲՏ անձանց դեմ բռնության, ատելության խոսքի բացառման ուղղությամբ: