Անմեղության կանխավարկածը փոխարինվել է անպատժելիության կանխավարկածով. Հայկ Ալումյան

Եթե Սուրիկ Խաչատրյանի մեքենայի վրա արձակված կրակոցների դեպքը չլիներ, այսօր մամուլում ամենաշատ քննարկվող ինֆորմացիան կշարունակեր լինել Տիգրան Խաչատրյանի մանակցությունը մայիսի 2-ի Գորիսի դեպքին. այսօր լրագրողներին նման կարծիք հայտնեց իրավաբան Հայկ Ալումյանը:

«Ինձ համար ուղղակի շատ տարօրինակ է, որ այդքան կրակոցների պայմաններում որևէ մեկին վնաս չի պատճառվել»,- ասաց նա և հավելեց, որ չգիտի` կատարվածը պատահականությո՞ւն է, թե՞ ոչ:

Անդրադառնալով Գորիսի ծեծկռտուքի դեպքին` Ալումյանը նշեց, որ այն իր համար ինչ-որ տեղ կանխատեսելի էր: «Կանխատեսելի էր, ոչ թե այն պատճառով, որ դրան մասնակցում էր Տիգրան Խաչատրյանը, այլ նրա համար, որ անպատժելիությունը պարարտ հող է ստեղծում նման դեպքերի համար: Իսկ այն, որ 2013-ի հունիսի 1-ից որոշ մարդկանց նկատմամբ գործում է անպատժելիության կանխավարկած, մենք բոլորս ենք տեսնում: Անմեղության կանխավարկածը, ցավոք, փոխարինվել է անպատժելիության կանխավարկածով,  և դրա հետևանքները մենք դեռ երկար կզգանք»,- ասաց փաստաբանը և հավելեց. «Ես վատ կանխատեսումներ ունեմ, որ մենք հաճախ ենք Սյունիքում նման դեպքեր տեսնելու, եթե մարդիկ չտեսնեն և չհամոզվեն, որ մեղավորները ենթարկվում են քրեական պատասխանատվության»: