Դատախազությունը պնդեց՝ թույլ տալ այսօր հրապարակել Ռոբերտ Քոչարյանի ու Արմեն Գևորգյանի գործով մեղադրական եզրակացության եզրափակիչ մասը. նիստը, սակայն, հետաձգվեց

ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի գործով դատական նիստում Արմեն Գևորգյանի փաստաբան Լուսինե Սահակյանը ժամանակ խնդրեց՝ ծանոթանալու գործի նյութերին։ Նա նոր է ներգրավվել որպես Գևորգյանի պաշտպան։

Մեղադրող դատախաղ Գևորգ Բաղդասարյանը հայտարարեց՝ ինքը Լուսինե Սահակյանի հետ մեկ հարցում համաձայն է՝ ինքն էլ տպավորություն ունի, որ այս գործով դատական նիստերը, կարծես,  փորձ է արվում անընդհատ ձգձգել։

«Ես լրիվ համաձայն եմ, բայց դատարանին այդ հարցում մեղադրելու փոխարեն ես Լուսինե Սահակյանին խորհուրդ եմ տալիս նիստից հետո դիտել իր ելույթի տեսագրությունը»,- ասաց նա։

Բաղդասարյանը նշեց, թե շատ լավ են հասկանում այն հնարքը, որ դատարանում փորձում է անել պաշտպանական կողմը։ Դատախազը դատարանին միջնորդեց չհետաձգել դատական նիստն ու իրենց հնարավորություն տալ հրապարակելու մեղադրական եզրակացության եզրափակիչ մասը։

Լուսինե Սահակյանն էլ ասաց, թե այստեղ եկել է պաշտպանություն իրականացնելու, ոչ թե՝ ուղղակի նստելու։ «Ուստի խնդրում եմ ինձ տրամադրել ողջամիտ ժամկետ»,- ասաց փաստաբանը։

Քոչարյանի փաստաբան Հայկ Ալումյանն էլ ասաց, թե ականատես են լինում, որ մեղադրական կողմի թերացումները փորձ է արվում օգտագործել պաշտպանական կողմի դեմ։

«Սա հերթական թերացման հետևանքն է, ինչ այսօր տեղի է ունենում»,- ասաց փաստաբանը։

Դատավոր Աննա Դանիբեկյանը հայտարարեց, որ դատարանը ևս մեկ շաբաթ է տալիս Լուսինե Սահակյանին, որ ծանոթանա գործի նյութերին։ Սահակյանն էլ ասաց, որ դա ողջամիտ ժամկետ չէ ու չի կարող ամբողջությամբ ծանոթանալ նյութերին։

Դատական նիստը հետաձգվեց մինչև հոկտեմբերի 12-ի ժամը 13։00-ն։