Հանրապետական Թուրքիայում առաջին անգամ եկեղեցի կկառուցվի

Հանրապետական Թուրքիայի պատմության մեջ առաջին անգամ իշխանությունները եկեղեցի կառուցելու թույլտվություն են տրամադրել ասորական համայնքին:

Ըստ Ermenihaber-ի՝ նախկինում թուրքական իշխանությունները եկեղեցիների վերանորոգման համար էին միայն թույլտվություն տալիս:

Հայտնի է, որ ասորական եկեղեցին կառուցվելու է Եշիլքյոյ թաղամասում գտնվող  իտալական գերեզմանատան տարածքում:

Ստամբուլի Բաքըրքյոյ շրջանի թաղապետ Բյուլենթ Քերիմօղլուն, այցելելով Ստամբուլի, Անկարայի ասորական ուղղափառ եկեղեցու միտրոպոլիտ Յուսուֆ Չեթինի նստավայր, հանձնել է եկեղեցի կառուցելու գրավոր թույլտվությունը: Նա նշել է, որ շուտով սկսվելու են Թուրքիայի Հանրապետության պատմության մեջ առաջին անգամ կառուցվելիք եկեղեցու շինարարական աշխատանքները, որի համար կպահանջվի մոտ 2 տարի:

Ասորական ուղղափառ եկեղեցու միտրոպոլիտ Յուսուֆ Չեթինի հաղորդմամբ` շուրջ 10 տարի իրենք ջանքեր են գործադրել եկեղեցու կառուցումը հաջողելու համար: Նա շնորհակալություն է հայտնել բոլոր նրանց, ովքեր աջակցել և ներդրում են ունեցել այդ գործում:

«Թուրքիայում ասորական համայքը ազգային և կրոնական փոքրամասնությունների շարքում զբաղեցնում է երկրորդ տեղը՝ զիջելով միայն հայ համայնքին»,- ասել է ասորի հոգևոր առաջնորդը:

Ըստ միտրոպոլիտի` ասորական շատ վանքեր և եկեղեցիներ կան Թուրքիայի հարավարևելյան և արևելյան շրջաններում, իսկ Ստամբուլում չկան: