Թուրքիայում կկառուցվի հանրապետության ժամանակաշրջանում առաջին եկեղեցին

Ասորական Մարիամ Աստվածածին եկեղեցու հիմնադրամը նոր եկեղեցի կառուցելու համար դեռևս 2009 թվականին դիմել էր Պոլսի քաղաքապետարան` այդ նպատակով իրենց տարածք հատկացնելու պահանջ ներկայացնելով: Ըստ «Ակօս»-ի` քաղաքապետարանը 7 տարի անց պատասխանել է խնդրանքին` թույլ տալով նոր եկեղեցի կառուցել:

Նոր կառուցվելիք եկեղեցին կլինի Թուրքիայի Հանրապետության հռչակումից (1923 թ.) ի վեր կառուցված առաջին եկեղեցին: Շինարարական աշխատանքները կսկսվեն ամիսներ անց: Ըստ կանխատեսումների` եկեղեցու կառուցումը կավարտվի մեկուկես տարուց:

Եկեղեցու հիմնադրամի տնօրեն Սաիթ Սուսին հայտնել է, որ քաղաքապետարանն իրեն պատկանող տարածքներից մեկը հատկացրել է եկեղեցու համար: Նորակառույց եկեղեցին կգտնվի Կ. Պոլսի Եշիլքոյ Սերբեսթի փողոցում: Եկեղեցին կկրի Մարդինի եկեղեցիների շունչը: