Ճանապարհային ոստիկանությունից բողոքողները մեր համակարգի վրա ցեխ շպրտողներն են. Օսիպյան

ՀՀ ոստիկանապետ Վալերի Օսիպյանը համաձայն չէ, որ ճանապարհային ոստիկանության հետ կապված դժգոհություններն ավելացել են: Կառավարության նիստից հետո լրագրողների հետ զրույցում նա ասաց. «Միշտ էլ ճանապարհային ոստիկանության հետ կապված եղել է այդ դժգոհությունը: Ուղղակի կան մարդիկ, որոնք փորձում են ցեխ շպրտել ոստիկանության վրա, և ոստիկանական ստորաբաժանումներից մեկն են ընտրել, որն անմիջապես շփվում է քաղաքացիների հետ: Բայց ՃՈ-ն, անկեղծ եմ ասում, այսօր նույնպես կաշկանդված չէ, քանի որ «ոչ» ենք ասել կոռուպցիային: Վստահեցնում եմ` ոստիկանությունում չկա կաշառակերության որևէ դրվագ:  Համացանցում ասում են, թե սաբոտաժ են անում, բայց ասելը քիչ է, ես էլ ասում եմ` ճանապարհային ոստիկանությունն այսօր էլ ավելի լավ է աշխատում: Եկեք, տեսեք, թե մեր ոստիկանության լրատվական ծառայությունն ինչքան գովեստի զանգեր է ստանում` նույն ՃՈ անձնակազմին ուղղված, «Ֆեյսբուք»-ի ինչքան օգտատերեր կան, որոնք նկարներ կամ նյութեր են տեղադրում, թե ոնց է ՃՈ աշխատակիցն իրենց աջակցել, թե որքան բարեխիղճ է ծառայել»:

Լրագրողները հետաքրքրվեցին` ճի՞շտ են տեղեկությունները, որ կաշառք վերցնելու հնարավորությունը նվազել է, և ճանապարհային ոստիկանությունից աշխատողների զգալի արտահոսք կա։ Օսիպյանը պատասխանեց, որ նման բան չկա, և այդ ծառայողներին ինքն է աշխատանքից ազատել, ոչ թե նրանք են դուրս եկել աշխատանքից: «Ես եմ ազատել այն աշխատողներին, որոնց մասով զգացել եմ, որ փոխված իրավիճակում չեն կարող բարեխիղճ ծառայել»,- հայտարարեց նա և հավելեց` հավաստիացնում է, որ նրանք քիչ էին, գուցե` մոտ  20 հոգի:

Այդուհանդերձ,  ոստիկանապետը չհստակեցրեց, թե ինչի հիման վրա է նման մտավախություններ ունեցել, պատճառաբանեց, թե չի կարող «փակագծեր բացել»: