Բողոքողները բացել են Վարդենիս-Երևան ճանապարհը. բողոքը Սոթքի հանքավայրի ղեկավարությանն էր ուղղված

Տեղեկացրել էինք, որ Վարդենիսի և շրջակա համայնքների բնակիչները փակել են Վարդենիս-Երևան ճանապարհը և պահանջում են, որպեսզի իրենց աշխատանք տրամադրեն: Այս մասին Yerkir.am-ի հետ զրույցում ասել էր Սոթք գյուղի նախկին համայնքապետ Կոլիկ Շահսուվարյանը: Նա նշել էր, որ տեղի բնակիչները հիմնականում աշխատում են «ԳեոՊրոՄայնինգ Գոլդ» ընկերության շահագործած ոսկու հանքավայրում, և հենց նրանց էլ ուղղված է իրենց պահանջը:

Գեղամասար համայնքի ղեկավար Հակոբ Ավետյանը Yerkir.am-ի հետ զրույցում նշեց, որ իրականում ոչ թե տեղի գյուղացիներն են փակել ճանապարհը, այլ՝ Սոթքի աշխատողները:

«Իրենք ճանապարհը փակել են՝ ի նշան իրենց ղեկավարության դեմ բողոքի: Իսկ թե կոնկիրետ պատճառը որն է, չգիտեմ: Գիտեմ միայն, որ հանդիպում է եղել, համաձայնության են եկել ու ճանապարհը բացել են»,-ասաց Ավետյանը: