Ինչո՞ւ չկա կանխավարկած, որ Հայաստանի կառավարությանը գուցե հաջողվել է համոզիչ փաստարկներ բերել. Փաշինյանը` Արցախյան հակամարտության մասին

ՀՀ վարչապետի պաշտոնակատար Նիկոլ Փաշինյանը վստահեցնում է` Արցախի հարցում նոր բան չկա: Այս մասին նա հայտարարեց լրագրողների հետ զրույցում` անդրադառնալով Ադրբեջանի ԱԳ նախարարի հայտարարությանը, թե Հայաստանն ու Ադրբեջանը փոխըմբռնման են հասել:

«Ես ավելի շատ կցանկանայի մեկնաբանել մեր հայտարարությունները: Միլանում համանախագահների հետ հանդիպման ժամանակ Հայաստանի և Ադրբեջանի ԱԳ նախարարներն ինչ-որ հաղորդագրություն են համաձայնեցրել, և ասվել է, որ երկար ժամանակ չէր հաջողվում նման բան: Նմանատիպ բազմաթիվ հայտարարություններ են եղել վերջին 25 տարում»,- ասաց նա:

Անդրադառնալով ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ հանդիպմանը` Փաշինյանն ասաց, որ Կասպրշիկի այցերը նորություն չեն և աշխատանքային բնույթ են կրում: «Դրանք նախկինում չէին լուսաբանվում, բայց ես հանձնարարել եմ, որ բոլոր շփումները պարտադիր լուսաբանվեն, որովհետև կարծում եմ` շփման պրոցեսը պետք է լինի թափանցիկ»,- ասաց նա:

Խոսելով հայաստանյան տարբեր մեկնաբանների կողմից արված վերլուծությունների մասին` վարչապետի պաշտոնակատարն ասաց. «Երբ ինչ-որ մեկնաբանություն է հնչում Ադրբեջանի կողմից, որը լավատեսական ինչ-որ էլեմենտ է պարունակում, ինձ զարմացնում է, որ  հայաստանցի մի շարք մեկնաբանների առաջին կանխավարկածն այն է, որ ինչ-որ դավադրություն կա, իսկ ինչո՞ւ չկա այնպիսի կանխավարկած, որ Հայաստանի կառավարությանը գուցե  հաջողվել է համոզիչ փաստարկներ բերել»:

Փաշինյանն ընդգծեց, որ Հայաստանի ոչ մի իշխանություն Արցախի հարցում այնքան թափանցիկ չի եղել, որքան իրենց կառավարությունը: