Հայերը խելացի և աշխատասեր ժողովուրդ են․ Թրամփ

ԱՄՆ նախագահ Դոնալդ Թրամփը ստորագրել է Կոնգրեսի կողմից ընդունված օրինագիծը, որով Միացյալ Նահանգներն օգնություն է ցուցաբերելու Մերձավոր Արևելքի կրոնական փոքրամասնություններին։ Ստորագրման արարողությանը ներկա է եղել նաև Հայ առաքելական եկեղեցու արքեպիսկոպոս. հաղորդում է «Ամերիկայի ձայնը»։

«Այս օրենքը շարունակությունն է իմ վարչակազմի աշխատանքի, որն ԱՄՆ-ի օգնությունը հասցեական ուղղում է հալածվող համայնքներին, այդ թվում՝ և կրոնական կազմակերպությունների միջոցով»,- նշել է Դոնալդ Թրամփը:

Սպիտակ տանը կայացած ստորագրման արարողությանը Միացյալ Նահանգների կրոնական կազմակերպությունների ներկայացուցիչներից ներկա էր միայն Հայ առաքելական եկեղեցու արքեպիսկոպոս Այկազյանը: Մյուս կրոնականները արտերկրից էին ժամանել: «Այս փաստաթղթով մեր պետությունը որոշել է, որ հետայսու պիտի թույլ չտա, որ քրիստոնյաները տառապեն և ամեն կերպ նյութական ու բարոյական օգնություն պետք է տրամադրի նրանց»,- ասել է  նա:

Վիգեն արքեպիսկոպոս Այկազյանի խոսքով՝ ԱՄՆ-ի օգնությունը նախատեսվում է բաշխել ինչպես Իրաքում և Սիրիայում բնակվող, արդեն փոքրաթիվ քրիստոնյա համայնքների, այդպես էլ՝ հալածանքների պատճառով այլ երկրներ տեղափոխված քրիստոնյաների և եզդիների միջև. «Նրանք, ովքեր գաղթական են և ծանր վիճակում են, նույնպես պետք է օգտվեն ամերիկյան նպաստից: 300 միլիոն դոլարի մասին է խոսքը»:

Ստորագրման արարողությանը նախորդած զրույցներում Պետքարտուղարության ներկայացուցիչը հատուկ ընդգծել է Հայաստանի ներդրումը Մերձավոր Արևելքից քրիստոնյա գաղթականներին ընդունելու գործում, նշում է արքեպիսկոպոսն՝ ավելացնելով, որ Սպիտակ տան անվտանգության հարցերով խորհրդական Ջոն Բոլթոնը հատուկ տպավորված էր Հայաստան կատարած այցից:

Ինչ վերաբերում է նախագահ Թրամփին, ապա հայերի մասին նա լավ էր տեղեկացված. «Ես հայ եմ, ասացի: «Օ՜, հայերը, ասաց, խելացի և աշխատասեր ժողովուրդ են»: Այո, ասացի, և բարեկամներդ են»: