Վերջ տվեք այս քաղաքականությանը. Քոչարյանի աջակիցները ակցիա են անում՝ պահանջելով ազատ արձակել նրան

Հանրապետության հրապարակում մեկնարկել է ՀՀ երկրորդ նախագահ Ռոբերտ Քոչարյանի աջակիցները բողոքի ակցիան:  Նրա ազատությունը պահանջող նախաձեռնող խմբի ղեկավար Արմեն Մինասյանը հայտարարեց, որ այսօրվանից սկսվում է երկարատև պայքարի փուլ։

«Սկսում ենք պայքար, պայքարը երկարատև է լինելու, իսկ հաղթական վերջակետն այն է լինելու, որ հարգվեն ՀՀ Սահմանադրությունը և դրանից բխող օրենքներն ու միջազգային օրենքները։ Մարդու պատվին ու արժանապատվությանը հասցվող վնասը պետք է տեղ չունենա Հայաստանում։ Նշանակել են է մեղավոր և հայտարարել, թե այդ մեղավորները  նշանակված են  ԶԼՄ-ի կողմից՝ չհիշելով, որ մեղավոր ճանաչելու մեկ իրավասու մարմին կա՝ դատարան, ավելի ճիշտ` կար, քանի որ չկա այլևս դատարան: Եթե Ռոբերտ Քոչարյանն  ազատ չարձակվի, նշանակում է` դատարան գոյություն չունի»,- հայտարարեց նա:

Ըստ Մինասյանի՝ Ռոբերտ Քոչարյանը 2008-ի մարտի 1-ին գործել է իր լիազորությունների շրջանակում:

 Հանրապետության հրապարակում ներածական խոսքից հետո ակցիայի մասնակիցները շարժվեցին դեպի  գլխավոր դատախազություն:

«Վերջ տվեք այս քաղաքականությանը, դուք չեք կարող հանդես գալ ամբողջ ժողովրդի անունից»,- դատախազության շենքի առջև հայտարարեց Արմեն Մինասյանը:

Հիշեցնենք, որ ՀՀ վերաքննիչ դատարանը վճռել էր ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ առաջին ատյանի դատարանի որոշումը թողնել անփոփոխ: Առաջին ատյանի դատարանը նախկինում որոշել էր որպես Ռոբերտ Քոչարյանի խափանման միջոց ընտրել կալանքը: 

2008 թվականի մարտի 1-ից 2-ն ընկած ժամանակահատվածում Երևանում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: