Սփյուռքի նախարարությունը հնարավոր է վերակազմավորվի որպես որևէ նախարարության առանձին կոմիտե. Մխիթար Հայրապետյան

Նախարարության գործունեության 6-ամսյա աշխատանքն ամփոփելիս Սփյուռքի նախարարի պաշտոնակատար Մխիթար Հայրապետյանն անդրադարձավ իր ղեկավարած գերատեսչության պահպանման անհրաժեշտությանը:

Նա հիշեցրեց, որ թե' վարչապետը, թե' փոխվարչապետերը հայտարարել են գերատեսչությունների թվի կրճատման մասին, և նշեց, որ դեռ վերջնական որոշում չկա` որ գերատեսչությունները կփակվեն կամ այլ ձև կստանան:

Հայրապետյանի խոսքով` իր աշխատանքի 6 ամիսների ընթացքում տպավորություն է ստացել, որ Սփյուռքի նախարարությունն ի սկզբանե ստեղծվել ու կրել է սիմվոլիկ բնույթ: «Տպավորություն ունեմ, որ այս գերատեսչությունն իր առջև չի դրել ամենահավակնոտ խնդիրները։ Պետության կողմից այդ գերատեսչության առջև անլուծելի խնդիրներ չեն դրվել։ Այս իմաստով իմ կարծիքը հետևյալն է` եթե նախարարությունը պետք է լինի բացառապես խորհրդանշական բնույթի, Սփյուռքի աչքերին թոզ փչելու  և որոշակի ակնկալիքներ ու կարիքներ հոգալու համար, ապա պարտադիր չէ, որ ձևաչափը լինի առանձին նախարարության տեսքով։ Բայց ես կարծում եմ, որ Հայաստանի Հանրապետությունը կարող է իրեն թույլ տալ ունենալ Սփյուռքի ուժեղ նախարարություն։ Ինչ որոշում էլ կայացնի նոր կառավարությունը, ես վստահ եմ, որ այն միտված է լինելու ավելի արդյունավետ աշխատանք կազմակերպելուն»,- ասաց Հայրապետյանը:

Նա չբացառեց, որ նոր կառավարության կազմում Սփյուռքի նախարարությունը կարող է վերակազմավորվել որպես որևէ նախարարության առանձին կոմիտե կամ գործակալություն։