Կոչ ենք անում կոռեկտ ընտրապայքարի, ով կանցնի կարմիր գիծը, կստանա համարժեք պատասխան. Նաիրա Զոհրաբյան

ԱԺ «Ծառուկյան» խմբակցության պատգամավոր Նաիրա Զոհրաբյանն անիմաստ է համարում այս պահին խոսել հետընտրական հնարավոր կոալիցիաների մասին: Այս մասին նա ասաց խորհրդարանում լրագրողների հետ զրույցում: «Թե ինչպիսի հետընտրական կոալիցիաներ, պայմանավորվածություններ, զարգացումներ կլինեն, այս բոլոր հարցերին իմաստ կունենա անդրադառնալ բացառապես միայն դեկտեմբերի 9-ի արտահերթ խորհդրանական ընտրություններից հետո: Հնարավոր հետընտրական զարգացումների հետ կապված հարցերի ես իրավասություն չունեմ և իմաստ չեմ տեսնում պատասխանել այն պարզ պատճառով, որ որևէ մեկն այս պահին չի կարող կանխատեսել ընտրությունների արդյունքը»,- ասաց Զոհրաբյանը:

Դիտարկմանը` կարծիք կա, որ այս արտահերթ ընտրությունները լինելու են բովանդակազուրկ, սևերի-սպիտակների բաժանումը անխուսափելի կլինի կրկին, պատգամավորն արձագանքեց. «Ընտրություններին բովանդակություն տալը կախված է քաղաքական ուժերից, և եթե քաղաքական ուժերը չզբաղվեն ամեն օրը, օրինակ, ապատեղեկատվությունների մեկնաբանմամբ, այլ հանրությանը հնարավորություն տրվի ներակայացնելու տնտեսական, քաղաքական օրակարգ, մեզանից յուրաքանչյուրի նախընտրական ծրագիրը, հավատացնում եմ ձեզ, որ ընտրությունները կլինեն բովանդակային»:

Դիտարկմանն էլ` հիմնական պայքարը գնում է երկու ուժի մեջ` ՀՀԿ և ՔՊ, ԲՀԿ-ի մասին չի խոսվում, Զոհրաբյանը պատասխանեց, որ նման բան չի նկատում: «Խոսելով չի որոշվում ամեն ինչ: Շատ մարդու մասին շատ բան են խոսում: Մենք գնում ենք` օրակարգում ունենալով մեր քաղաքական և տնտեսական ծրագիրը, մեր զրուցակիցը լինելու է ՀՀ քաղաքացին: Մենք չենք պատրաստվում մարտի բռնվել մնացած քաղաքական ուժերի հետ: Բոլորին կոչ ենք անում կոռեկտ ընտրության, ով կխախտի կոռեկտության սահմանը, ով կանցնի ընտրապայքարի համար թույլատրելի կարմիր գիծը, բնականաբար, անպայման համարժեք պատասխան կստանա»: