ՀՀԿ-ն դեմ է քվեարկելու Նիկոլ Փաշինյանի վարչապետի թեկնածությանը. Գալուստ Սահակյան

ՀՀԿ-ն դեմ է քվեարկելու Նիկոլ Փաշինյանի վարչապետի թեկնածությանը. լրագրողներին ասաց ՀՀԿ-ական պատգամավոր Գալուստ Սահակյանը։ «Մենք դեմ ենք քվեարկելու։ Նախապես ինչ ասել ենք, այսօր դա էլ անելու ենք»,- նշեց նա։

Անդրադառնալով վարչապետի ելույթում հնչեցրած մեղադրանքներին, թե ՀՀԿ-ն ռևանշ է ցանկանում, հին օրենսգրքով ՀՀԿ-ն 0 ձայն կստանա, Սահակյանն ասաց. «Նախ` ռևանշի խնդիրներ գոյություն չունեն: Մենք կողմնակից են լիարժեք համամասնականին, բայց պիտի քննարկվի: Այն առաջարկությունները, որ մեր կողմից կամ այլ քաղաքական ուժերի կողմից դրվել են, դրանք պիտի Ընտրական օրենսգրքում տեղադրվեն: Խնդիրները, որոնք դրել են թե' հանրապետականները, թե' մյուս քաղաքական ուժերը, դրանք չկան օրենսգրքում»:

Դիտարկմանը` վարչապետն ասաց` գործող ԸՕ-ով ՀՀԿ-ն ձայներ հավաքելու շանս չունի, պատգամավորը պատասխանեց. «Եթե նույնիսկ շանս էլ չունենա հավաքելու, միևնույն է` Հանրապետականը երկրի ամենակարևոր քաղաքական ուժն է մնալու: Մի' մտածեք, որ ամբողջովին խորհրդարանն է, իսկ խորհրդարանում հանրապետականներ կլինեն»:

Սահակյանը նշեց, որ արտահերթ ընտրություններին ՀՀԿ-ն պետք է մասնակցի, իսկ ինքը կլինի՞ ցուցակում, թե՞ ոչ, պատասխանեց. «Ես պետք է որոշեմ` կլինե՞մ, թե՞ չէ, նաև մեր կուսակցությունը պետք է որոշի»:

Նա նաև ասաց, որ մասնակցելու դեպքում ՀՀԿ-ն կլինի խորհրդարանում: «Կարծում եմ` մեծամասնություն չենք լինի, բայց ինչ-որ քանակ կունենանք, եթե չունենանք` ՀՀԿ-ն կլինի երկրի ամենաամուր քաղաքական ուժը»,- շեշտեց Սահակյանը: