Երկրում չպետք է թույլ տալ քաղաքական ռասիզմ. Փաշինյանը` Հունան Պողոսյանի նշանակման մասին

Այսօր կառավարության նիստում նշանակվեց երեք մարզպետ: Տարածքային կառավարման և զարգացման փոխնախարար Դավիթ Գևորգյանը նշանակվեց Արագածոտնի մարզպետ, նախկին փոխոստիկանապետ Հունան Պողոսյանը` Սյունիքի մարզպետ, Համբարձում Մաթևոսյանը` Արմավիրի մարզպետ:

Վարչապետ Փաշինյանն իր խոսքում նշեց, որ Դավիթ Գևորգյանը թավշյա հեղափոխության ակտիվ մասնակիցներից է, Հունան Պողոսյանը հեղափոխության ընթացքում եղել է փշալարների մյուս կողմում, իսկ Համբարձում Մաթևոսյանն առհասարակ քաղաքական նախընտրություններ չունեցող անձ է:

Փաշինյանն անդրադարձավ Պողոսյանին մարզպետ նշանակելու որոշմանը և ասաց, որ իր այս որոշումը կարող է տարօրինակ թվալ, քանի որ Պողոսյանը նախկին իշխանության տարիների ծառայող է:

Ըստ վարչապետի` խորհրդարանական արտահերթ ընտրություններից հետո ամենակարևոր խնդիրը լինելու է ավարտված համարել թավշյա հեղափոխությունը և ժողովրդի ներուժը ներգրավել Հայաստանի հետագա զարգացման գործում: «Այս իմաստով կարևոր է, որ երկրում տեղի ունեցած փոփոխության արդյունքում որևէ մեկն իր կյանքն ավարտված չհամարի ՀՀ-ում: Ոստի ՀՀ-ում չպետք է թույլ տանք, որ զարգանա մի այնպիսի երևույթ, որը կարելի է կոչել քաղաքական ռասիզմ, երբ մարդիկ հետապնդվում են այն պատճառով, որ նրանք գործունեություն են ծավալել նախկին իշխանությունների հետ»,- ասաց նա:

Ըստ Փաշինյանի` գալիս է լիարժեք համախմբման ժամանակը:  «Կա բարիկադներ կառուցելու և դրանք ապամոնտաժելու ժամանակ, և ես հույս ունեմ, որ մենք մոտենում ենք այդ եզրագծին: Այս տրամաբանությունը չի նշանակում ինդուլգենցիա որևէ մեկի հասցեին»,- ասաց նա և շեշտեց, որ դա չի նշանակում, թե փակում են կառավարությունում կադրային փոփոխությունները, օպտիմալացումը, ավելի արդյունավետ կառավարման համակարգ ունենալը: