Ցավոք, կան շրջանակներ, որոնք Ղարաբաղյան հարցն ընկալում են որպես տարածքային վեճի խնդիր. Նիկոլ Փաշինյան

Տեղեկացրել էինք, որ Կանադայի վարչապետ Ջասթին Թրյուդոն և ՀՀ վարչապետ Նիկոլ Փաշինյանն այսօր հանդիպեցին լրագրողների հետ:

Կանադայի վարչապետն ասաց, որ այսօր այցելել է Ծիծեռնակաբերդ, և զգացմունքային փորձառություն էր իր համար այնտեղ այցելելը:

«Աշխարհը պետք է ասի` այլևս երբեք: Կանադան վաղուց ճանաչել է Հայոց ցեղասպանությունը՝ ոչ միայն դատապարտելու համար այդ ողբերգությունը, այլ երաշխավորելու, որ հետայսու այն չի շարունակվի և կրկնվի: Անցյալի ճանաչումն առաջին քայլն է դեպի հաշտեցում ու խաղաղություն»,- ասաց Թրյուդոն:

ՀՀ վարչապետ Նիկոլ Փաշինյանի խոսքով՝ Հայոց ցեղասպանության ճանաչումը նաև անվտանգության խնդիր է, քանի որ այսօր էլ ունենք անվտանգության սպառնալիք: «Այսօր Հայաստանը գտնվում է բլոկադայի մեջ, քանի որ փակված է հայ-թուրքական սահմանը»,- նշեց նա:

Փաշինյանը հայտնեց նաև, որ Կանադայի վարչապետի հետ զրուցել են նաև Ղարաբաղյան հիմնախնդրի մասին: Նրա խոսքով՝ ինքն ընդգծել է, որ պետք է արձանագրել և ընկալելի դարձնել, թե, ի վերջո, ինչն է պատճառ դարձել, որ ծագել է Ղարաբաղյան հարցը: «Ցավոք, կան շրջանակներ, որոնք Ղարաբաղյան հարցն ընկալում են որպես տարածքային վեճի խնդիր: Բացարձակապես այդպես չէ, ո՛չ, Արցախում ապրող ժողովրդի առջև կանգնել էր ցեղասպանության սպառնալիքը, և մարդիկ ուղղակի պաշտպանել են իրենց` ապրելու իրավունքը: Ղարաբաղի կոնֆլիկտը ծագել է, քանի որ մարդու ամենապրիմիտիվ՝ ապրելու իրավունքը վտանգի առաջ է կանգնած եղել»,- ասաց Փաշինյանը:

Կանադայի վարչապետն էլ նշեց, որ հույս ունի՝ Ղարաբաղյան հիմնահարցը խաղաղ ճանապարհով իր հանգուցալուծմանը կհասնի: