Քաղաքական ինքնասպանությունների շարքը շարունակվում է. Փաշինյան

ԱԺ «Ելք» խմբակցության պատգամավոր Ալեն Սիմոնյանն ԱԺ հարցուպատասխանի ժամին վարչապետ Նիկոլ Փաշինյանից հետաքրքրվեց, թե արտահերթ ընտրությունների հետ կապված կա՞, արդյոք, որևէ հստակեցում, բանակցություն: Ի պատասխան վարչապետը նշեց, որ երեկ հանդիպման ընթացքում ինքն ասել է, որ դեկտեմբերին ՀՀ-ում պետք է տեղի ունենան արտահերթ խորհրդարանական ընտրություններ:

«Ես ասել եմ նաև մեխանիզմի մասին, և ՀՀԿ-ական ու «Ծառուկյան» դաշինքի ներկայացուցիչները նշել են, որ վարչապետի պաշտոնը թափուր մնալու դեպքում իրենք չեն պատրաստվում վարչապետի թեկնածու առաջադրել: ՀՅԴ ներկայացուցիչն էլ համաձայնել է սրա հետ: Այս ամենը եղել է այն համատեքստում, որ մեր գործընկերները հստակ արձանագրել են այն քաղաքական իրավիճակը, որն այսօր առկա է երկրում: Կարծում եմ՝ խելամտությունը ստիպում է` երկրորդ մայիսի 1 անելու գայթակղությանը տրվելն անտեղի և ավելորդ կլինի»,- ասաց Փաշինյանը:

Նրա խոսքով՝ մամուլում այսօր եղան հրապարակումներ, որոնց տրամաբանությունն առնվազն նույնական չէ իր ասածի հետ, սակայն ինքը դա մեծ խնդիր չի համարում: «2018-ի մայիսի 1-ին ես ԱԺ ամբիոնից էլ ազդարարեցի քաղաքական որոշ ուժերի` ինքնասպանություն գործելու փաստի մասին և կարող եմ ասել, որ ցավալիորեն ինքնասպանությունների շարքը շարունակվում է»,- ասաց վարչապետը: