Ոստիկանների շրջանում ինքնասպանությունների թիվը մեծ է

Ռուսաստանի ներքին գործերի նախարար Ռաշիդ Նուրգալիեւը հայտարարել է, որ հարկավոր է աշխատանք տանել` ոստիկանների շրջանում ինքնասպանության դիմողների կամ հոգեբանական ճգնաժամ ունեցողների թիվը կրճատելու ուղղությամբ:

«Ոստիկանության աշխատակիցների հետ բարոյահոգեբանական աշխատանքները տարվելու են նրանց ծառայության անցնելուց անմիջապես հետո եւ մինչեւ նրանց թոշակի անցնելը»,- ասել է նախարարը:

«Ինտերֆաքսը» տեղեկացնում է, որ Նուրգալիեւն ասել է, թե ոստիկանների շրջանում հրազենով սպանությունների եւ ինքնասպանությունների թիվը մեծ է: Եվ դրանց պատճառները տարբեր են` ընտանեկան խնդիրներ, հակասություններ գործընկերների եւ ղեկավարների հետ եւ այլն:

Ըստ նախարարի` այդ բարդ աշխատանքով զբաղվողները միշտ հոգեբանական վերականգնողական ծառայությունից օգտվելու կարիք ունեն: