Մանվել Գրիգորյանի կինը չի ընդունում առաջադրված մեղադրանքը

Ապօրինի կերպով զենք-զինամթերք ձեռք բերելու և պահելու մեջ մեղադրվող Մանվել Գրիգորյանի կինը` գնդապետ Նազիկ Ամիրյանը, չի ընդունում իրեն առաջադրված մեղադրանքը: Այս մասին Yerkir.am-ին հայտնեց Ամիրյանի պաշտպան Լևոն Բաղդասարյանը: Նա նշեց, որ առաջիկայում իր պաշտպանյալի մանակցությամբ քննչական գործողություններ կլինեն, որոնց մասին, նախաքննության գաղտնիությունից ելնելով, չի կարող ասել:

Հիշեցնենք, որ Նազիկ Ամիրյանը ձերբակալվել է հունիսի 27-ին: Երեք օր անց նրան մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով նախատեսված հանցավոր արարքի կատարման համար:

Նախաքննական նյութերի համաձայն` ապացույցների համակցությամբ հիմնավորվել է, որ Ն. Ամիրյանը Մանվել Գրիգորյանի և մի խումբ այլ անձանց հետ նախնական համաձայնությամբ Արմավիրի մարզի Արշալույս գյուղի Լճափնյա փողոցի 28 և 30 հասցեներում գտնվող առանձնատներում մինչև 2018 թվականի հունիսի 16-ը ապօրինի կերպով պահել է ռազմամթերք հանդիսացող ընդհանուր 17606 հատ տարբեր տրամաչափի փամփուշտ, 20 հատ «Փ-1» տեսակի ձեռքի բեկորային մարտական նռնակ, 20 «УЗРГМ-2» տեսակի մարտական պայթուցիչներ, 18 հատ կրակոցներ՝ իրենց բաղկացուցիչ մաս կազմող 13 մեկնարկային վառոդային լիցքերով, հրազեն հանդիսացող 40մմ տրամաչափի «РПГ-7В» տեսակի նռնականետ, որոնք հայտնաբերվել են նշված առանձնատներում 2018թ.-ի հունիսի 16-ին կատարված խուզարկություններով:

Ն. Ամիրյանի նկատմամբ խափանման միջոց է ընտրվել ստորագրությունը չհեռանալու մասին: