Մանվել Գրիգորյանի քրեական գործով կան այլ կասկածյալներ ևս, ովքեր հարցաքննության են կանչվելու. Արթուր Դավթյան

Ազգային ժողովի պատգամավոր Մանվել Գրիգորյանի նկատմամբ հարուցված քրեական գործով կան այլ կասկածյալներ ևս, ովքեր առաջիկայում հարցաքննության են կանչվելու. խորհրդարանում լրագողների հետ զրույցում հայտնեց ՀՀ գլխավոր դատախազ Արթուր Դավթյանը:

Նա նշեց, որ այս պահին կան մարդիկ, որոնց նկատմամբ քրեական հետապնդում է իրականացվում: «Մեր ձեռք բերված տվյալները վկայում են մեծաթիվ անձանց ներգրավվածության մասին»,- ասաց գլխավոր դատախազը:

Հարցին՝ որքանո՞վ է հնարավոր այս քրեական գործին 2016 թվականին պաշտպանության նախարար աշխատած Սեյրան Օհանյանի առնչությունը, Դավթյանը պատասխանեց. «Գործը քննվելու է ամբողջ ծավալով։ Ցանկացածը, ով մասնակցություն ունեցած լինի այս գործին, և ում արարքում կլինեն հանցակազմի հատկանիշներ, կտրվեն համարժեք գնահատականներ, և հրապարակայնությունը կապահովվի»։

Անդրադառնալով շրջանառվող խոսակցություններին, թե առաջիկայում կարող է ձերբակալվել նաև Մանվել Գրիգորյանի կինը, Արթուր Դավթյանն ասաց, որ նրա ընտանիքի որոշ անդամներ ինչ-որ գործողություններում ներգրավված են եղել, ինչին համապատասխան գնահատական կտրվի: