Փոփոխությունների պահանջ կար. Արայիկ Հարությունյանը` իր հրաժարականի պատճառների մասին

Իմ հրաժարականը կապված չէ ակցիայի մասնակիցների պահանջի հետ, սակայն այսօր նոր` երիտասարդ կադրեր են պետք. այսօր լրագրողներին ասաց Արցախի պետական նախարար Արայիկ Հարությունյանը:

Նա նշեց, որ հանրության մոտ ձևավորված պահանջ և տրամադրություն կա` երկրում բարեփոխումների նոր փուլ իրականացնելու: «Վերջին մի քանի ամիսներին, մանավանդ` Հայաստանում կատարված իշխանափոխությունից հետո, Արցախի ժողովրդի մոտ նույնպես ձևավորվեց փոփոխություններ կատարելու պահանջ»,- ասաց Հարությունյանը` միևնույն ժամանակ հայտարարելով, որ չի պատրաստվում հրաժարվել քաղաքականությունից, շարունակելու է ղեկավարել իր կուսակցությունը:

«Վերջին մեկ ամսում նախագահի հետ քննարկում էինք, թե ինչպիսի բերափոխումներ են հարկավոր, որոնք հանրությանը վստահություն կներշնչեն: Այդ քննարկումների առանցքում դրվում էր կադրային լուրջ փոփոխությունների հարցը»,- ասաց նա:

Արայիկ Հարությունյանը նշեց, որ իր պաշտոնավարման ընթացքում Արցախում բազմաթիվ բարեփոխումներ են կատարվել, երկրում ժողովրդագրական աճ է գրանցվել, նվազել են միգրացիոն երևույթները, ծնելիությունն է աճել և այլն: Նրա խոսքով` վերջին մի քանի ամիսների ընթացքում Արցախում վերաբնակեցման լուրջ ծրագրեր են իրականացվել, որոնք պետք է շարունակել: