Ուրեմն դրա կարիքը կար. Հրայր Թովմասյանը՝ Հովիկ Աբրահամյանի հրաժարականի մասին

Ընթանում է ՀՀԿ Խորհրդի նիստը, որի ընթացքում քննարկվելու են վարչապետ Հովիկ Աբրահամյանի հրաժարականը, կառավարությունում կադրային փոփոխությունները, նոր վարչապետի թեկնածության հարցը:

ՀՀ Ազգային ժողովի աշխատակազմի ղեկավար Հրայր Թովմասյանը, լրագրողների հետ զրույցում անդրադառնալով վարչապետի հրաժարականի մասին լուրի` իր համար անպսասելի լինելուն, ասաց. «Ես այդպիսի զգացողություններ չունեմ, թե ինչ-որ բան սպասելի էր կամ անսպասելի: Եթե գործող վարչապետը հրաժարական է տալիս, ուրեմն դրա կարիքը կար»:

Yerkir.am-ի հարցին` արդյո՞ք նոր վարչապետը շարունակելու է պաշտոնավարել խորհրդարանական ընտրություններից հետո, նա պատասխանեց. «2018 թվականի ապրիլի 9-ին ցանկացած կառավարություն, որը կլինի այդ պահին, ևս հրաժարական է ներկայացնելու, և այդ պահին նշանակվող նոր վարչապետը պետք է համապատասխանի Սահմանադրության պահանջներին, այն է` վերջին 4 տարին պետք է բնակված լինի»:

Թովմասյանի կարծիքով` Հովիկ Աբրահամյանն արել է այն ամենը, ինչ այդ պահին կարող էր անել: «Նա արել է այն ամենը, ինչ այդ պահին կարող էր անել, իսկ թե որքանո՞վ է ստացվել, դա նրա և հասարակության գնահատականն է: Ես գնահատական չեմ տա, վարչապետն արդեն տվել է իր գնահատականը»,- նշեց նա: