Վարչապետը հանդիմանեց իր իսկ կառավարությանը որոշում կայացնելը ձգձգելու մեջ

Այսօր կառավարության նիստում օրակարգին անցնելուց առաջ վարչապետ Նիկոլ Փաշինյանն անդրադարձավ իտալական «Ռենկո» ընկերությանը, որը մտադիր էր Հայաստանում ՋԷԿ կառուցել: Նա նշեց, որ մոտ 10 օր առաջ է հանդիպել այդ ընկերության ներկայացուցիչների հետ, և այդ հարցով պետք է զբաղվեր արդարադատության նախարարությունը:

«Այժմ մենք մտահոգություններ ունենք, որ կառավարությունը կոնկրետություն չի մտցնում ու ինչ-որ առումով իր պարտավորությունները չի կատարում: Պարո'ն Զեյնալյան, կարո՞ղ եք ասել` ընկերության ներկայացուցիչների հետ հանդիպե՞լ եք, և ի՞նչ պայմանավորվածություններ են ձեռք բերվել»,- հարցրեց Փաշինյանը արդարադատության նախարարից:

Նախարար պատասխանեց, որ ընկերության ներկայացուցիչների հետ տեղի են ունեցել մի քանի պաշտոնական հանդիպումներ, պայմանագիրը հայերենով թարգմանվել է և դրվել շրջանառության մեջ: Միաժամանակ, հանդիպումներ են տեղի ունեցել ոլորտի փորձագետների, էներգետիկայի նախարարության մասնագետների հետ: Հիմա սպասում են էներգետիկայի նախարարության փորձագիտական եզրակացությանը:

Վարչապետը հարցրեց, թե կոնկրետ ի՞նչը պետք է հստակեցվի փորձաքննության արդյունքում:

Էներգետիկայի նախարարը նշեց, որ պայմանագրի տեքստը ուշ են ստացել, այն եղել է 250 էջանոց, ուղարկվել է էներգետիկայի ինստիտուտ, որպեսզի մասնագիտական եզրակացություն տրվի: Եվ քանի որ ՋԷԿ-ի շինարարությունը տևելու է 25 ամիս, ըստ պայմանագրի, կառավարությունն իր վրա է վերցնում 20 տարվա պարտավորություն, իսկ արտադրված էլեկտրաէներգիան պետք է արտահանվի: Էներգետիկայի ինստիտուտը պետք է տա փորձագիտական եզրակացություն, որպեսզի կառավարությունը հստակեցնի իր դիրքորոշումը այդ պայմանագրի վերաբերյալ:

Վարչապետը մտահոգություն հայտնեց, որ կողմերը պետք է հնարավորինս հստակեցնեն իրենց դիրքորոշումները, որպեսզի ներդրողներն իրենց անելիքն իմանան: «Եթե մենք ասում ենք` այո, ուրեմն արագ պետք է ասենք` այո, եթե մենք ասում ենք` ոչ, ուրեմն արագ պետք է ասենք, հակառակ դեպքում` այդ ձգձգումներն այլ տպավորություն կարող են թողնել: Որոշեք ու հնարավորինս արագ զեկուցեք ինձ»,- ասաց նա: