Միլիոնավոր դոլարների արարողություն. որքա՞ն է արժեցել արքայական հարսանիքը

Մայիսի 19-ին Վինձորի պալատի Սբ Գեորգ մատուռում կայացավ Մեծ Բրիտանիայի արքայազն Հարիի ու նրա հարսնացուի՝ ամերիկյան հայտնի դերասանուհի Մեգան Մարքլի հարսանիքը:

Bridebook-ը մանրամասներ է ներկայացրել արքայական հարսանիքի ծախսերի մասին: Կայքի հաղորդմամբ` միայն եկեղեցական արարողությանը մասնակցել է 800 հյուր, իսկ երեկոյան խնջույքին ներկա է եղել 600 մարդ:

Արքայական հարսանիքն արժեցել է 32 միլիոն ֆունտ ստերլինգ, այսինքն` մոտ 42.880.000 ԱՄՆ դոլար:

Հարսնացուի` մինչև եկեղեցի տանող ճանապարհը զարդարելու և տարբեր միջոցառումներ ձեռնարկելու համար ծախսվել է մոտ կես միլիոն դոլար:

Քեյթրինգի համար, որի մեջ ներառվել են ֆուրշետի տարբեր տեսակներ,  ծախսվել է մոտ 400.000, իսկ լավագույն խմիչքների համար` 300.000 ԱՄՆ դոլար:

Հարսանիքի ամենաանբաժանելի մասը համարվող ծաղկային ձևավորման վրաարքայական ընտանիքը ծախսել է մոտ 150.000, լուսանկարների և տեսագրությունների համար` 23.000, իսկ երաժշտության համար` մոտ կես միլիոն դոլար:

Հարսանեկան թխվածքի համար արքայական ընտանիքը վճարել է 67.000 ԱՄՆ դոլար:

Ինչ վերաբերում է Մեգանի հարսանեկան շքեղ զգեստին` այն արժեցել է 400.000 ԱՄՆ դոլար, իսկ փեսացուի` արքայազն Հարիի հատուկ համազգեստն արժեցել է մոտ 11.000 ԱՄՆ դոլար:

Նորապսակների ամուսնական մատանիները եղել են համեմատաբար «մատչելի»` մոտ 8000 դոլար:

Հարսնացուի սանրվածքն ու շպարը, որը համացանցի շատ օգտատերերի կողմից դրական է գնահատվել բնական լինելու պատճառով, արժեցել է 13.000 ԱՄՆ դոլար:

Կայքը նշում է, որ նորապսակները մեծ գումար են ծախսել նաև մեղրամիս գնալու համար` մոտ 160.000  ԱՄՆ դոլար: Ի դեպ, այս ծախսը հոգացել է Մեգանը` որպես նվեր: Այնուամենայնիվ, չի նշվում, թե արքայական նորաստեղծ ընտանիքը որտեղ և ինչպես է պատրաստվում անցկացնել մեղրամիսը: