Ժողովուրդը նաև ես եմ. Աղվան Վարդանյան

Խոստմանս համաձայն` իմ մանդատը վայր դրեցի. խորհրդարանում լրագրողներին ասաց ՀՅԴ-ական Աղվան Վարդանյանը:

Դիտարկմանը` պատգամավորը պետք է իր խղճով առաջնորդվի, և մանդատ վայր դնելը հակասահմանադրական է, նա արձագանքեց. «Դուք կարծո՞ւմ եք` ես դա չգիտե՞մ: Ես իմ ելույթի ժամանակ հայտարարել էի` եթե կուսակցությունս ցանկանա, ես պատրաստ եմ վայր դնել մանդատս»:

Հարցին` իրեն կուսակցությունից հեռացնելու քննարկում կա՞, Վարդանյանը պատասխանեց. «Կուսակցության ընկերների հետ զրույց կունենանք, ըստ այդմ` դուք տեղեկություն կստանաք»:

Լրագրողները հետաքրքրվեցին, թե ի՞նչ գործունեություն է ծավալելու: «Ծավալում եմ Աղվան Վարդանյանի բուռն գործունեություն»,- ասաց նա:

Աղվան Վարդանյանն իր մանդատ վայր դնելը «բռնապետական քայլ» չի որակում: «Բացարձակ, դա իմ որոշումն է: Ես առաջնորդվել եմ իմ խճով և համոզմունքով: Ես իմ ելույթում ասացի` եթե կուսակցությունս ցանկանա, ես վայր կդնեմ մանդատս, ինչն այսօր արել եմ»,- ասաց նա:

Հարցին` չի՞ փոշմանել, որ ժողովրդին դեմ է գնացել, Վարդանյանը պատասխանեց. «Եթե դուք կարդաք իմ ելույթը, այնտեղ ամեն ինչ ասված է` ժողովուրդը նաև ես եմ: Այդքան ասում եք` հայ ժողովուրդ, հայ ժողովուրդ, ժողովուրդը նաև ես եմ»:

Անդրադառնալով մամուլում շահարկվող թեմային, թե մանկատան երեխաների համար բնակարաններ կառուցելու ծրագրի պատճառով իր դեմ կոմպրոմատներ կային, Վարդանյանն ասաց. «Մոռացե'ք, այդ փողով պետությանը ոչ մի կոպեկի վնաս չի տրվել, և այդ զառացանքները վաղուց հերքվել են»: