Որքանո՞վ է Իսրայելը լավ զգալու, որ Ադրբեջանի պարտությունն ասոցացվի նաև իսրայելական զենքի պարտության հետ. Աղվան Վարդանյան

Հայտնել ենք, որ ԱԺ հայ-իսրայելական բարեկամական խումբը վերադարձել է Իսրայելից, որտեղ բարձրացվել են մի շարք կարևոր հարցեր: ԱԺ ՀՅԴ խմբակցության քարտուղար Աղվան Վարդանյանը լրագրողներին հայտնեց, որ մենք 26 տարվա դիվանագիտական հարաբերություններ ունենք Իսրաելի հետ, սակայն դրանք այնքան էլ խորը չէին:

«Անցած տարի երկու կարևոր այցելություն է եղել` Իսրայելի տարածարջանային հարցերով նախարարի այցելությունը Հայաստան և ՀՀ ԱԳՆ Էդվարդ Նալբանդյանի այցն Իսրայել ու հանդիպումը նրանց վարչապետի հետ: Այս երկու այցելություններով, կարծես, նոր սկսվեցին հայ-իսրայելական հարաբերությունները բոլոր ոլորտներում: Մենք ունենք այդ հարաբերությունները զարգացնելու շատ մեծ ներուժ»,- ասաց պատգամավորը:

Անդրադառնալով ԱԺ հայ-իսրայելական խմբի այցելությանը` նա նշեց, որ ընդգծել են, որ մեր երկրների հարաբերությունների զարգացումը բացարձակապես ուղղված չէ  որևէ երրորդ երկրի դեմ: «Ասել ենք, որ մենք առաջնորդվում ենք մեր ազգային-պետական շահերով, և այդ ընկալումը մեր գործընկերների մոտ կար. խոսքը հայ-իրանական հարաբերությունների մասին է»,- ասաց Վարդանյանը:

Նա տեղեկացրեց նաև, որ նախնական պայմանավորվածություն կա Հայաստան-Իսրայել բիզնես մեծ ֆորում կազմակերպելու վերաբերյալ, որը ուշանում է: Ըստ Վարդանյանի` պնդել են այդ ֆորումն արագ կազմակերպելու անհրաժեշտությունը:

«Իսրայելի տարածաշրջանային հարցերով նախարարը մի դիտարկում ուներ, որը կարևոր է տարածել և' Հայաստանում, և' Իսրայելում: Նա ասաց, որ Հայաստանում` Ցեղասպանության թանգարանում,  զարմանքով  տեսել է դեռևս 1920 թվականի անգլիական մի հրատարակություն, որում առաջին անգամ հոլոքոստ եզրն է օգտագործվել Հայկական ցեղասպանության մասին: Նա ասում էր, որ կարծում էին` դա իրենց Հոլոքոստի հետ ծնված բառ է, և զարմանալի է, որ նման բան եղել է դեռևս 1920 թվականին Հայաստանում»,- պատմեց Վարդանյանը:

Նա նաև ասաց, որ այցելել են Իսրայելի ցեղասպանության թանգարանը, որն ազդեցիկ է եղել, սակայն ավելի ազդեցիկ է եղել այն, որ թանգարանը լեփ-լեցուն է եղել, ինչը երբեք չես տեսնի Հայոց ցեղասպանության թանգարանի մասին: «Թանգարանը մարդկանցով լիքը լինելը կապի ազդանշան է հիշողության և ապագայի միջև, և ես կցանկանայի, որ նման կապ մենք կարողանայինք ունենալ նաև Հայաստանում: Մեր ցեղասպանության թանգարանում նման իրավիճակ երբեք չեմ տեսել»,- ասաց նա:

Վարդանյանը հայտնեց, որ խոսել են նաև Ադրբեջանին զենք մատակարարելու մասին: «Ասում էի` Հոլոքոստի թանգարանում ցույց եք տալիս, թե նացիզմը դեռ 1933 թվականից ինչպես էր ատելություն սերմանում հրեաների նկատմամբ` դասագրքերով, մամուլով, բոլոր հնարավոր միջոցներով: Բառացիորեն նույնը կատարվում է Ադրբեջանում` նույն դասագրքերով, նույն քարոզչությամբ, նույն պետական մակարդակով հայատյատություն, թշնամանք, և դուք զենք եք մատակարարում հարձակվողական մի երկրի, որը նույնական է ձեզ պատուհասած ողբերգության երկրի հետ»,- ասաց նա:

Վարդանյանը հավելեց. «Ես նրանց ասում էի հետևյալը` վստահեցնում եմ ձեզ, որ առաջիկա տարիներին Հայաստանը դառնալու է և' տնտեսական, և' քաղաքական առումով ազդեցիկ երկիր տարածաշրջանում, և դուք այսօրվանից պետք է մտածեք մեր հարաբերությունների բնույթի մասին, նաև պետք է մտածեք` նայեք առաջ: Ես վստահ եմ, որ այս հակամարտությունը լուծվելու է հայ ժողովրդի, Հայաստանի պետականության հաղթանակով, ուրիշ լուծում չի կարող ունենալ հակամարտությունը: Որքանո՞վ եք դուք լավ զգալու, որ Ադրբեջանի պարտությունն ասոցացվի նաև իսրայելական զենքի պարտության հետ»:

Վարդանյանը նշեց, որ թեև նրանք ունեն իրենց որոշակի փաստարկները, որ այլ երկրներ էլ են զենք վաճառում Ադրբեջանին, բայց նաև կարծում է, որ այս մեսիջների փոխանցումը լրջորեն մտածելու առիթ կտա:

Ըստ պատգամավորի` խոսվել է նաև Իսրայելում, հատկապես` Երուսաղեմում մեր ազգային ժառանգության մասին: «Ես կարծում եմ` մենք լրջագույն խնդիր ունենք այնտեղ մեր ժառանգության պահպանման հետ, որը միայն եկեղեցական խնդիր չէ: Այո, եկեղեցին անջատ է պետությունից, մեր երկու պատրիարքարանները առավելագույնս ինքնուրույն են, բայց սա չի կարող լինել միայն եկեղեցական խնդիր: Մենք պետք է գտնենք մեխանիզմներ, ձևեր այդ հարստությանը տեր կանգնելու, այդ հարստության հանդեպ ոտնձգությունը կանխելու առումով: Սսա ազգային պետականության անվտանգության խնդիր է և միայն եկեղեցու խնդիրը չէ»,- եզրափակեց Վարդանյանը: