«Երկիր ծիրանի»-ի անդամներն այցելել են դատաբժիշկների

«Երկիր ծիրանի» կուսակցությունը հաղորդագրություն է տարածել, ըստ որի`  այսօր «Երկիր ծիրանի» կուսակցության գրասենյակ են այցելել իրավապահ մարմինների ներկայացուցիչները փետրվարի 13-ին Երևանի ավագանու նիստում ՀՀԿ խմբակցության կողմից բռնության ենթարկված` «Երկիր Ծիրանի» խմբակցության ղեկավար Զարուհի Փոստանջյանից, խմբակցության անդամներ Մարինա Խաչատրյանից եւ Սոնա Աղեկյանից բացատրություն վերցնելու և նրանց դատաբժշկական փորձաքննության ուղեգիր տրամադրելու նպատակով:

«Երևանի ավագանու «Երկիր Ծիրանի» խմբակցության ղեկավար Զարուհի Փոստանջյանը, խմբակցության անդամներ Մարինա Խաչատրյանը և Սոնա Աղեկյանը փետրվարի 13-ին Երևանի ավագանու նիստում իրենց նկատմամբ բռնի գործողությունների հետևանքով ստացած մարմնական վնասվածքների առկայությունը ստուգելու համար այսօր այցելել են դատաբժիշկների:

«Երկիր Ծիրանի» կուսակցությունը Հայաստանի Հանրապետության իրավապահ մարմիններից ակնկալում է քրեական գործի հրատապ հարուցում և Տարոն Մարգարյանի գլխավորությամբ մեղադրյալների ներգրավում, որը մինչ այս պահը, առավել քան բավարար հիմքերի առկայության պայմաններում, դեռևս տեղի չի ունեցել»,- ասվում է հաղորդագրությունում:

Հիշեցնենք, որ փետրվարի 13-ին Երևանի ավագանու նիստի ժամանակ տեղի է ունեցել ծեծկռտուք. «Երկիր ծիրանի» խմբակցության անդամներն իրենց հետ բերել էին ապակե տարաներ` կոյուղաջրով: