Նիկոլ Փաշինյանը եկել է` ՀՀԿ-ին օգնելու. «Երկիր ծիրանի»-ի անդամ

«Երկիր ծիրանի» կուսակցությունից Երևանի ավագանու թեկնածուներ Ստելլա Աղաջանյանն ու Վարուժան Անտոնյանն այսօր լրագրողներին ներկայացրեցին իրենց նախընտրական ծրագրում տեղ գտած դրույթները:

Ստելլա Աղաջանյանի խոսքով՝ «Երկիր ծիրանի» կուսակցության ղեկավար Զարուհի Փոստանջյանի անբասիր գործունեությունը հավատ է ներշնչում:

«Անվերապահորեն վստահում եմ Զարուհի Փոստանջյանին՝ հաշվի առնելով նրա կամային բնավորությունը: Լինելով կին՝ իր փուխր ուսերին տանում է այս մախինայի դեմ դուրս գալու դրոշակակիր լինելու պատիվը»,- ասաց նա՝ հավելելով. «Վաճառվում է, տրվում է վարձով… Այսպիսի վերտառությամբ վահանակները խայտառակ փլուզում են առաջացնում: Այս ամենը կատարվում է, որպեսզի Հայաստանը հայաթափվի: Կոնկրետ քաղաքապետարանի իրականացրած ծրագիրը հայակենտրոն չէ, մարդակենտրոն չէ»:

Աղաջանյանի խոսքով՝ ընտրողը, Զարուհի Փոստանջյանի՝ առաջնորդի գործոնը նկատի ունենալով, պետք է գնա ու ընտրի «Երկիր ծիրանի»-ին:

«Ձեզ հարց տվե՞լ եք՝ ինչո՞ւ է ԱԺ անցած մարդը մասնակցում Երևանի ավագանու ընտրություններին, ինչո՞ւ է Նիկոլ Փաշինյանը մասնակցում: Ասեմ` որպեսզի ընտրողը չունենա երկու բևեռ»,- ասաց նա:

Հարցին՝ այսինքն՝ Նիկոլ Փաշինյանը եկել է` ՀՀԿ-ին օգնելո՞ւ, Աղաջանյանը պատասխանեց. «Այո, եթե անցել ես ԱԺ, էլ ինչո՞ւ ես եկել այստեղ»:

Վարուժան Անտոնյանի խոսքով՝ Երևանում լուրջ խնդիրներ կանկ, որոնք լուծելու համար կոնկրետ քայլեր են պետք: Ի դեպ, նա վստահ է, որ Տարոն Մարգարյանի նախընտրական պաստառների՝ ծիրանագույն լինելը հետևություն անելու տեղիք է տալիս: «Իբր մենք «Երկիր ծիրանի»-ն ենք»,- ասաց նա: