Վարչապետը պատրաստակամություն է հայտնել հանդիպել 5 ցուցարարի հետ

Վարչապետի ավագ օգնական Արամ Վարդևանյանը ցուցարարներին հայտնեց, որ  վարչապետն առաջարկում է 15-20 րոպեի ընթացքում 5 հոգանոց խումբ կազմել և բարձրանալ իր մոտ՝ աշխատանքային քննարկման։

«Քանի որ քննարկումը պետք է լինի աշխատանքային, պետք է ներողություն խնդրենք մեր լրատվամիջոցների ներկայացուցիչներից: Քննարկումներից հետո, բնականաբար, կներկայացնենք արդյունքները», - ասաց նա` շարունակելով. «Գոյություն ունեն քննարկման որոշակի ձևաչափեր, քանի որ սա աշխատանքային բնույթի է, ինչպես դուք նշեցիք՝ մտահոգություններ ներկայացնել, մտահոգություններին պատասխաններ տրամադրել։ Այս ձևաչափով արդյունավետ աշխատանքն այդ տարբերակով է արվում»։

Սակայն ուսանողները համաձայն չեն առանց լրատվամիջոցների ու ուղիղ հեռարձակման հանդիպել վարչապետի հետ:

Վարչապետի օգնականը նշեց, որ իրենց մամուլի ծառայության նկարած տեսանյութը կտրամադրի նրանց: