Դիլիջանում հենց հենակետն էին վերացրել, բայց սա այդ դեպքը չէ. «Սևան» ազգային պարկի տնօրեն

Հայտնել էինք, որ «Սևան ազգային պարկ» ՊՈԱԿ-ին պատկանող փայտյա պահակակետում հրդեհ է բռնկվել:

Yerkir.am-ը հրդեհի հնարավոր միտումների ու պատճառի մասին պարզաբանում խնդրեց «Սևան ազգային պարկ» ՊՈԱԿ-ի տնօրեն Վահե Գուլանյանից: Նա նշեց, որ այրված կառույցը երբևիցե պահակակետ չի եղել: «Դա 70-80-ական թվականներից լքված ինչ-որ շինություն է` քարե և փայտե պատերով: Այդ ժամանակներից Նորատուսի անտառտնտեսությունից մնացած պետական սեփականություն է, ազգային պարկինն էլ չէ: Ապամոնտաժման ենթակա շինություն է, որը չի շահագործվում»,- հայտնեց Գուլանյանը:  

Նա շեշտեց, որ ազգային պարկն այդտեղ ունի մեկ հենակետ, որը բավականին մեծ և քարե  շինություն է:

Ինչ վերաբերում է հրդեհի պատճառներին, ապա Գուլանյանը նշեց, որ բազմաթիվ վարկածներ են շրջանառվում, սակայն միտումնավոր հրդեհելու տարբերակը նա բացառեց:  «Չեմ կարծում, որ միտում լինի, քանի որ անպետք շինություն է, և միտումնավոր հրդեհելու իմաստ էլ չկար»,- ասաց ազգային պարկի տնօրենը:

Նա բացատրեց` երբ տեսուչները ծուխ են նկատել, կարծել են` անտառն է այրվում, և միանգամից հրշեջ ծառայությանն են դիմել:

«Դիլիջան» ազգային պարկի և այս դեպքի միջև Գուլանյանը կապ չի տեսնում: «Դա ուրիշ պատմություն է: Սա այդ դեպքը չէ: Դիլիջանում հենակետը նոր էինք ավարտել, նոր էր հանձնվել շահագործման: Դիլիջանում գիտենք` ինչ խնդիր է: Դա փայտանյութի հետ էր կապված: Այնտեղ հենց նպատակային արգելափակոցն ու այդ հենակետն էին վերացրել, բայց սա այդ դեպքը չէ»,- ասաց նա:

Նշենք, որ դեպքի կապակցությամբ Գեղարքունիքի մարզային պետական հրդեհային և տեխնիկական անվտանգության տեսչությունում նյութեր են նախապատրաստվում: