Ընդերքի տրամադրման և օգտակար հանածոների պաշարների գործակալությունները կմիավորվեն

Կառավարության վաղվա նիստի օրակարգում ներառված է որոշում` ՀՀ էներգետիկ ենթակառուցվածքների և բնական պաշարների նախարարության աշխատակազմի ընդերքի գործակալության կանոնադրությունը և կառուցվածքը հաստատելու և կառավարության համապատասխան որոշման մեջ փոփոխություն կատարելու մասին:

Ընդերքի տրամադրման գործակալության և օգտակար հանածոների պաշարների գործակալության գործառույթների և բիզնես գործընթացների ուսումնասիրությունը ցույց տվեց, որ այս գործակալությունների գործունեությունը մեկը մյուսի տրամաբանական շարունակությունն է և կարող է իրականացվել մեկ առանձնացված ստորաբաժանման կողմից: Ելնելով այս հանգամանքից և նրանից, որ ընդերքի ոլորտը կարգավորող օրենսդրական դաշտը հիմնականում մշակված է և ընդերքի բաժնի ծանրաբեռնվածությունը նվազել է աշխատակազմի օպտիմալության տեսանկյունից նպատակահարմար է այս ստորաբաժանումների միաձուլումը:

ՀՀ էներգետիկայի և բնական պաշարների նախարարությունը մշակում և ապահովում է օրենքով, այլ իրավական ակտերով իր իրավասությանը վերապահված բնագավառներում ՀՀ կառավարության քաղաքականության իրականացումը:

Այդ քաղաքականությունն առավել լիարժեք իրականացնելու նպատակով մշտապես ուսումնասիրվում է աշխատակազմի կառուցվածքի արդյունավետությունը` որին և միտված են նախատեսվող փոփոխությունները:

Կարգավորման նպատակն է կառուցվածքային փոփոխության արդյունքում բարձրացնել նախարարության աշխատակազմի կողմից իրականացվող աշխատանքների արդյունավետությունը:

Նախագծի ընդունմամբ ակնկալվում է նախարարության գործառույթների առավել լիարժեք իրականացում և նրա գործունեության արդյունավետության բարձրացում: