Շամիրամում սպանդի մեջ մեղադրվող Թելման Քալաշյանի տանը զենքեր են հայտնաբերվել

Արագածոտնի մարզի Շամիրամ գյուղում սպանդ կատարելու կասկածանքով հետախուզվող Թելման Քալաշյանի տանը խուզարկություն է կատարվել: Shamshyan.com-ի տեղեկություններով՝ Արմավիրի մարզի Մյասնիկյան գյուղում գտնվող` Քալաշյանի տանը ՝ հյուրասենյակի բազմոցի դարակի մեջ, հայտնաբերել են «ՏՏ» տեսակի ատրճանակ՝ իր պահունակով՝ լիցքավորված 7.62 մմ տրամաչափի 8 փամփուշտով։ Թոնրատանն էլ քննիչները հայտնաբերել են չհաշվառված «ԻԺ-18 Ե» տիպի մեկփողանի ողորկափող որսորդական հրացան։

Ավելի վաղ Yerkir.am-ը գրել էր, որ ոստիկաններն ուժեղացված հսկողություն են իրականացնում Քալաշյանի տանն ու նրա հարազատներին պատկանող տներում՝ ենթադրյալ վենդետայից խուսափելու համար: Մեր տեղեկություններով՝ Քալաշյանի ընտանիքի անդամներն այս սեզոնին գտնվում են սարում և զբաղվում անասնապահությամբ:

Հիշեցնենք, որ օգոստոսի 1-ին Շամիրամ գյուղում ենթադրյալ հանցագործություն կատարած անձը՝ անձնական անբարյացակամ հարաբերություններից դրդված, մուտք է գործել գյուղի գերեզմանատան տարածքում գտնվող սգո սրահի տարածք, կրակոցներ արձակել այնտեղ գտնվող մարդկանց ուղղությամբ և դիմել փախուստի: Կրակոցների հետևանքով ստացած հրազենային վնասվածքներից 3 անձ մահացել է տեղում, 1-ը` բժշկական կենտրոնում, 6 անձ՝ տարբեր մարմնական վնասվածքներով տեղափոխվել է բժշկական հաստատություններ: Ստեղծվել է քննչական խումբ:

Ձեռք բերված ապացույցների համակցությամբ՝ քննիչը որոշում է կայացրել Թ. Քալաշյանին ՀՀ քրեական օրենսգրքի 104-րդ հոդվածի 2-րդ մասի 1-ին և 6-րդ կետերով, 235-րդ հոդվածի 1-ին մասով և 34-104-րդ հոդվածի 1-ին մասով որպես մեղադրյալ ներգրավելու մասին, նրա նկատմամբ հայտարարվել է հետախուզում:  Նշենք նաև, որ հանցագործությունը պարտակելու կասկածանքով ձերբակալվել է Քալաշյանի հորեղբայրը, ով, ըստ գործի նյութերի, մեկ այլ ավտոմեքենայով գնացել է Թ. Քալաշյանի մոտ, և միասին դիմել են փախուստի: