Կապանում 8-ամյա երեխային վրաերթի ենթարկելու մեջ կասկածվող դատավորի եղբորորդին ձերբակալվեց

Երեկ երեկոյան Կապանում 8-ամյա աղջնակի վրաերթի կասկածանքով ձերբակալվել է Սյունիքի մարզի ընդհանուր իրավասության առաջին ատյանի դատարանի դատավոր Նապոլեոն Օհանյանի եղբորորդին՝ Նարեկ Օհանյանը:

Shamshyan.com-ի տեղեկություններով՝ վարորդը դեպքից հետո դիմել է փախուստի, սակայն ժամեր անց մեղայականով ներկայացել ոստիկանություն: Ֆոտոլրագրողի տեղեկություններով՝ Ն. Օհանյանը եղել է ոչ սթափ /խմած/ վիճակում, ինչի համար էլ քննիչի կողմից նշանակվել է փորձաքննություն։ Վերցվել է արյան նմուշ՝ պարզելու համար սթափության աստիճանը։

Ավելի վաղ հայտնել ենք, որ հուլիսի 21-ին, ժամը 22:09-ին ահազանգ է ստացվել, որ Կապան քաղաքի Գես թաղամասի թիվ 24 շենքի մոտակայքում տեղի է ունեցել վրաերթ. անհրաժեշտ է օգնություն: Այս մասին տեղեկանում ենք ԱԻՆ կայքից: Դեպքի վայր է մեկնել մեկ մարտական հաշվարկ: Պարզվել է, որ Ն. Օ.-ը «Lexus GX470» մակնիշի 55 CC 550 պետհամարանիշով ավտոմեքենայով վրաերթի է ենթարկել 2009 թ. ծնված Օքսաննա Գրիգորյանին, ով տեղում մահացել է: Բացատրական աշխատանքների արդյունքում վարորդը մեղայականով ներկայացել է Կապանի ոստիկանություն: