Հայտնի է Հրաչյա Հարությունյանին Հայաստան տեղափոխելու օրը

Ռուսաստանում մահվան ելքով վթարի համար 6.9 տարվա ազատազրկման դատապարտված Հրաչյա Հարությունյանը Մոսկվայից Հայաստան կտեղափոխվի հուլիսի 16-ին: Այս մասին Yerkir.am-ին հայտնեց Հարությունյանի ազգականը՝ Վիկտոր Մարտիրոսյանը՝ նշելով, որ այդ մասին հեռախոսով իրեն տեղեկացրել է Հրաչյա Հարությունյանը: 

Հիշեցնենք, որ երեկ առավոտյան Ռուսաստանի Տամբովի մարզի N3 քրեակատարողական հիմնարկից Հարությունյանին տեղափոխել են Մոսկվա:

ՀՀ Արդարադատության նախարարությունից  Yerkir.am-ին հայտնեցին, որ Ռուսաստանի Դաշնությունում դատապարտված Հրաչյա Հարությունյանի փոխանցման գործընթացն ընթանում է միջազգային պայմանագրով սահմանված կարգով և դատապարտյալի փոխանցումն իրականցնելուց հետո ՀՀ արդարադատության նախարարությունը հանրությանը լրացուցիչ կտեղեկացնի:

Հիշեցնենք, որ 2013-ի հուլիսի 13-ին ՌԴ Պոդոլսկի շրջանի մերձակայքում Հրաչյա Հարությունյանի վարած «Կամազ» մակնիշի մեքենան բախվել էր մարդատար ավտոբուսին, ինչի հետևանքով զոհվել էր 18 մարդ, դատապարտվել էր 6 տարի ու 9 ամիս ազատազրկման: Դատավճռի համաձայն՝ Հրաչյա Հարությունյանը մեղավոր է ճանաչվել երկու հոդվածով, այն է` ճանապարհային երթևեկության և տրանսպորտային միջոցների շահագործման կանոնները խախտելը, որն առաջացրել է ծանր հետևանքներ և կեղծ փաստաթղթի օգտագործումը: