Լրացուցիչ ջրառ կիրականացվի Սևանա լճից` ոռոգման նպատակով

Այսօր կառավարության նիստում հաստատվեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին» նախագծին հավանություն տալու մասին հարցը:

«Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում փոփոխություն անհրաժեշտությունը պայմանավորված է Սևան-Հրազդան դերիվացիոն համակարգից սնվող ոռոգման համակարգերի իշխման տակ ընկած հողերի ոռոգման ջրապահովության դեֆիցիտը մասնակի մեղմելու/ջրապահովվածությունը բարձրացնելու անհրաժեշտությամբ:

Օրենքով  ամրագրված է լճից ջրի առավելագույն չափաքանակ` 170 մլն խոր. մ: Ջրբացթողումներն իրականացվում են ՀՀ կառավարության ամենամյա որոշումներով ամրագրված ամենամյա չափաքանակների շրջանակներում՝ սահմանված կարգին համապատասխան:

Եղել են տարիներ, երբ լճից 170 մլն խոր. մ ծավալով ջրբացթողնման դեպքում ոռոգման ջրի դեֆիցիտը լրացվել է Մխչյանի, Ռանչպարի, ինչպես նաև խորքային հորերի պոմպերով մեխանիկական լրացուցիչ ջրարտադրության միջոցով, ինչն էլ ոռոգման ջրամատակարարման կազմակերպությունների համար բերել է բյուջեով չնախատեսված նոր ֆինանսական պարտավորությունների:

Անհրաժեշտ է փոխել օրենքով սահմանված ոռոգման նպատակով լճից 2017թվականի բացթողման 170 մլն խոր. մ չափաքանակը՝ այն դարձնելով մինչև 270 մլն խոր. մ, ինչը ունի համապատասխան հիմնավորումներ:

 Ակնկալվող արդյունքները` հողերին մատակարարվող ոռոգման ջրի դեֆիցիտի մեղմում,  ոռոգում իրականացնող կազմակերպությունների մոտ մեխանիկական ջրարտադրության փոխարինում ինքնահոսով և էլեկտրաէներգիայի մասով նոր պարտքերի չձևավորում:

Նշվեց, որ լրացուցիչ ջրառը բնապահպանական խնդիր չի առաջացնելու և չի խախտելու լճի մակարդակի բարձրացման դրական հաշվեկշիռը:

Բնապահպանության նախարար Արծվիկ Մինասյանը երկու օր ժամանակ խնդրեց փաստաթղթի վրա աշխատելու համար:

Կարեն Կարապետյանը կտրուկ արձագանքեց. «Ոչ, կոմիտեներին ու նախանիստերին ժամանակ ունեիք քննարկելու: Մենք ասել էինք, որ այդ պրակտիկան դադարեցնեք, դրան գնալ խիստ անհրաժեշտ դեպքերում: Մի օր դա պետքն է դադարեցնել: Մեկ օր ժամանակ եմ տալիս»: