Թալիշում կսկսվի նոր մանկապարտեզի և դպրոցի շինարարությունը

Առաջիկա օրերին Թալիշում կսկսվի նոր մանկապարտեզի և դպրոցի շինարարությունը: Այս մասին Արցախ այցելած լրագրողների հետ զրույցում ասաց Թալիշի գյուղապետ Վիլեն Պետրոսյանը: Նշենք, որ գյուղի հին դպրոցն ուղիղ նշանառության տակ է գտնվում դիրքերից, այդ իսկ պատճառով նոր դպրոցն առավել անվտանգ վայրում կկառուցվի:

Գյուղապետը հայտնեց, որ նախատեսվում է նաև սկսել երեք բնակելի տների շինարարություն: Ներկայումս Թալիշում բնակվում են հիմնականում թալիշցի պայմանագրային զինծառայողներն ու գյուղում շինարարական աշխատանքներ իրականացնող անձինք: Շուրջ 500 բնակչություն ունեցող գյուղի բնակիչներից շատերն ապրում են Ալաշան բնակավայրում, որոշներն էլ` Արցախի և ՀՀ տարբեր բնակավայրերում, նաև` արտերկրում:

Գյուղապետի խոսքով՝ հակառակորդի կողմից իրականացված գործողությունների արդյունքում տուժած բնակիչների վնասները, մասնավորապես` վնասված ավտոմեքենաներինը, կառավարությունն ամբողջությամբ փոխհատուցել է: Երկրորդ փուլով կփոխհատուցվի գյուղացիների անասնագլխաքանակին հասցված վնասը:

Խոսելով գյուղի անվտանգության խնդրի մասին` Պետրոսյանն ասաց. «Այսօր որոշակիորեն մեծացել է վտանգը, սակայն, դրան զուգահեռ, մենք նոր տարբերակներով ենք ուզում դիմակայել և ապահովել բնակիչների անվտանգությունը»: Նրա խոսքով՝ Թալիշում նոր կառուցվող բոլոր տները կունենան իրենց ապաստարանները:

Գյուղապետի հայտնեց, որ շուտով թթի բերքահավաքը կսկսվի, և գյուղացիները կգան` իրենց բերքը հավաքելու: Նա համոզմունք հայտնեց, որ եթե Թալիշը դարձյալ բնակեցվի, թալիշցիներին կտրվի առանձին կարգավիճակ և նրանց տրվող արտոնությունները կտարբերվեն մնացած բնակավայրերին տրվող արտոնություններից: