Հավելյալ արժեք ստեղծողները մեկնարկային փուլում կսուբսիդավորվեն

Այսօր կառավարության նիստում վարչապետը հանձնարարական տվեց տնտեսության գերակա ոլորտներին պետության  աջակցության վերաբերյալ:

«Բազմիցս բարձրաձայնել ենք տնտեսական գերակա ոլորտներում պետության կողմից նպատակային և արդյունավետ աջակցություն տրամադրելու մասին: Կարծում եմ` ժամանակն է, որ կառավարությունը գերակա ոլորտներում աշխատող և նոր ստեղծվող ձեռնարկություններին ցուցաբերի աջակցություն, մասնավորապես` առաջարկում ենք այդ ոլորտներում իրականացնել պետության կողմից ձեռնարկություններին բանկերից տրամադրվող կոմերցիոն վարկերի որոշակի տոկոսների սուբիսավորման նոր քաղաքականություն»,- ասաց վարչապետը:

Ըստ նրա` դա կնպաստի տնտեսության արդյունավետության ու մրցունակության բարձրացմանը, հավելյալ արժեք ստեղծողներին աջակցմանը և, ամենակարևորը, նոր ու կայուն աշխատատեղերի ստեղծմանը: Վարչապետը հանձնարարեց տնտեսական զարգացման, ֆինանսների, գյուղատնտեսության նախարարներին` երկշաբաթյա ժամկետում կենտրոնական և կոմերցիոն բանկերի հետ համատեղ քննարկել բանկային տոկոսների սուբսիդավորման հստակ առաջարկություններ` ըստ գերակա ոլորտների:

«Կարծում եմ` կարևոր գործընթաց ենք սկսում: Երկու խոսքով ուզում եմ մեկնաբանել` մենք նման քննարկումներ իրականացրել ենք գյուղատնտեսության նախարարությունում կաթիլային ոռոգման, գյուղտեխնիկայի լիզինգային սպասարկման վերաբերյալ: Թեթև արդյունաբերության ոլորտում եթե վարկ են վերցնում, մենք տրամադրված ենք երկու տարով սուբսիդավորել բանկային տոկոսները»,- ասաց Կարեն Կարապետյանը: