Տարածաշրջան այցից հետո ԵԱՀԿ ՄԽ համանախագահները հանդես են եկել հայտարարությամբ

ԵԱՀԿ Մինսկի խմբի համանախագահները տարածաշրջան կատարած այցի արդյունքներով հայտարարություն են տարածել:

Ինչպես տեղեկանում ենք ԵԱՀԿ պաշտոնական կայքից՝ ԵԱՀԿ Մինսկի խմբի համանախագահներ Իգոր Պոպովը (ՌԴ), Սթեֆան Վիսկոնտին (Ֆրանսիա) և Ռիչարդ Հոգլանդը (ԱՄՆ), ինչպես նաև ԵԱՀԿ նախագահի անձնական ներկայացուցիչ Անջեյ Կասպշիկը մարտի 11-ին եղել են Բաքվում, իսկ մարտի 27-ին՝ Երևանում, այնուհետև՝ Լեռնային Ղարաբաղում:

Ըստ հայտարարության, համանախագահների՝ տարածաշրջան կատարած այցի նպատակն է ընդհանուր պատկերացում ունենալ շփման գծի ու հայ-ադրբեջանական սահմանին տիրող քաղաքական, ռազմական իրավիճակի վերաբերյալ, քննարկել 2016-ին Վիեննայում և Սանկտ Պետերբուրգում կայացած հանդիպումների ժամանակ կողմերի միջև ունեցած պայմանավորվածությունների իրականացման ընթացքը:

Համանախագահների հայտարարության մեջ նշվում է, որ նրանք հանդիպել են Հայաստանի, Ադրբեջանի նախագահների, արտգործնախարարների, ինչպես նաև Արցախի իշխանությունների հետ: Նաև այցելել են Լեռնային Ղարաբաղ:

Իշխանությունների հետ հանդիպումների ժամանակ համանախագահները արտահայտել են իրենց խորին մտահոգությունները շփման գծում վերջին իրադարձությունների կապակցությամբ՝ կողմերին կոչ անելով իրենց ելույթներում և գործողություններում զսպվածություն ցուցաբերել:

Համանախագահներն առաջարկել են, որ հատկապես Նովրուզի ու Զատիկի տոներին կողմերը խուսափեն էսկալացաիայից:

Նրանք հայտնել են նաև, որ պատրաստ են շարունակել բանակցային գործընթացը՝ մինչև հիմնախնդրին խաղաղ ու քաղաքական լուծում կգտնվի:

Երկու երկրների իշխանությունների հետ հանդիպումներում, ըստ հայտարարության, համանախագահները ընդգծել են դեսպան Կասպշիկի առաքելությանն աջակցությունն ու դրա սկզբունքային նշանակությունը: Համանախագահները նաև պնդել են, որ զինադադարի նկատմամբ հարգանքը կարևոր է հետագա բանակցություններում կառուցողական ու փոխվստահության մթնոլորտ ձևավորելու համար: