Ես հիմա ձեր կողքին եմ, ինձ չե՞ք տեսնում. Աշոտյանի արձագանքն իր` քարոզարշավին չմասնակցելու մասին հարցին

Այսօր լրագրողների հետ զրույցում ՀՀԿ փոխնախագահ Արմեն Աշոտյանը նշեց, որ իրականում ՀՀԿ քարոզարշավով զբաղվում են բոլոր ՀՀԿ-ակաները: Ըստ նրա` այն, ինչ տեսնում ենք ՀՀԿ հանրահավաքներին, ընդամենը սառցաբեկորի գագաթն է:

Հարցին, թե ինչո՞վ է պայմանավորված հանգամանքը, որ քարոզարշավի ժամանակ չենք տեսնում հայտնի ՀՀԿ-ականներին, այդ թվում` իրեն, նա պատասխանեց. «Զարմանալի է, ես հիմա ձեր կողքին եմ, ինձ չե՞ք տեսնում»:

Աշոտյանը նշեց, որ քարոզչական գործունեությունը բազմաշերտ է, և ինքը շատ լավ հասկանում է որոշ շրջանակների բզբզոցներն այդ թեմայով: «Դրանք ուղղակի ժպիտ են առաջացնում: Եթե բզբզալու լինենք, «Ծառուկյան» ու «Ելք» դաշինքների ներսում այնքան բզբզալու բաներ կան: Այդ մարդիկ թող իրենք անձամբ գնան իրենց հավաքներին, ոչ թե գյուղեգյուղ ընկնեն, իսկ իրենց հիմնական քարոզչական տեսանյութերում այնպես անեն, որ հանկարծ չերևան»,- ասաց նա: