Կարեն Կարապետյանը հանձնարարական տվեց նավթամթերքի որակի վերաբերյալ

Այսօր կառավարության նիստում վարչապետ Կարեն Կարապետյանը հանձնարարական տվեց մատակարարվող նավթամթերքի որակի վերաբերյալ: Նա նշեց, որ կատարված ուսումնասիրությունները վկայում են, որ նավթամթերքի ու դիզվառելիքի որակի հետ կապված խնդիրներ կան:

«Նշված խնդիրը հաճախ պայմանավորվում է վառելիքի տեսակների ոչ հստակ տարանջատմամբ, ինչպես նաև գործնականում առկա որոշակի բացերով, արդյունքում` էական վնաս է պատճառվում սպառողներին և շուկային»,- ասաց Կարեն Կարապետյանը:

Վարչապետը հանձնարարեց ՀՀ տնտեսական զարգացման և ներդրոմների նախարարին` մեկամսյա ժամկետում բենզինի, դիզելային վառելիքի և այլ վառելանյութերի վաճառքի ոլորտում չարաշահումների վերացման, որակի վերահսկողության գործառույթները առավել արդյունավետ իրականացնելու նպատակով ՀՀ կառավարության աշխատակազմ ներկայացնել առաջարկություն՝ համապատասխան թույլտվությունները ըստ վառելիքի տեսակների հստակ տարանջատելու վերաբերյալ` հաշվի առնելով Հայաստանի ներքին շուկայում դրանց սպառման փաստացի կառուցվածքը:

«Հաջորդը՝ այս հարցը համատեղ քննարկել ՀՀ պետական եկամուտների կոմիտեի հետ, մշակել այս ոլորտում առկա խնդիրները վերհանող և կանխարգելող հստակ մեթոդաբանություն»,- ասաց նա: