Թուրք պաշտոնյայի հայտարարությունը՝ Ցեղասպանության զոհերի հիշատակին նվիրված հուշարձանի կանգնեցման վայրում

Տեղեկացրել ենք, որ Գերմանիայի Քյոլն քաղաքի «Lehmbacher Weg» գերեզմանատանը Հայոց ցեղասպանության զոհերին հիշատակին հուշարձան կկանգնեցվի:

Թուրքական «Անադոլու» գործակալությունն արձագանքել է որոշմանը՝ հրապարակելով Քյոլնում թուրքերի համերաշխության և նախաձեռնությունների պլատֆորմի խոսնակ Լևենթ Թաշքըրանի հայտարարությունը:

Գերեզմանատան դիմաց հայտարարությամբ հանդես եկած թուրք պաշտոնյան նշել է, որ այն «ներքին խաղաղությանը վնասող» որոշում է:

«Նման որոշում կայացնել մի քաղաքում, որտեղ ապրում է ավելի քան 100.000 թուրք, կվնասի ներքին խաղաղությանը: Մենք բացառապես չենք ճանաչում այս որոշումը, հրաժարվում ենք այն ընդունել, և սա համարում ենք հակադեմոկրատական քայլ»,-հայտարարել է Թաշքըրանը:

Նա նշել է, որ իրենք շարունակելու են պայքարել, որպեսզի «հետ կանգնեն այս սխալից»: