Ժամանակն է կյանքի կոչելու Մեծն Զորավարի պատգամը. Է. Հովհաննիսյանը ՝ Հայաստանի անկախության համար նահատակվածների հիշատակին նվիրված հուշարձանի տեղադրման մասին

Խ. Աբովյանի անվան հայկական պետական մանկավարժական համալսարանի պատմության և հասարակագիտության ֆակուլտետի դեկան Էդգար Հովհաննիսյանը գրում է.

«1919թ. Հայաստանից հեռանալուց առաջ Զորավար Անդրանիկը իր ղեկավարած Հայկական առանձին Հարվածող Զորամասի միջոցներից 15 հազար ռուբլի է հատկացնում կաթողիկոսին ապագայում Միացյալ Հայաստանի մայրաքաղաքում Հայաստանի անկախության համար նահատակվածների հիշատակին նվիրված արձան կանգնեցնելու համար։

Այդ օրվանից անցելել են տասնամյակներ, ավելացել է Հայաստանի անկախության և ազատության համար նահատակված հայորդիների թիվը, ճիշտ է դեռ չունենք Միացյալ Հայաստան, բայց շուրջ երեք տասնամյակ է ունենք անկախ պետականություն։

Մինչ օրս չունենք մեր նահատակներին արժանի հավաքական հուշարձան, չհաշված առանձին հուշաքարերն ու խաչքարերը։

Հաջորդ տարի լրանում է Հայաստանի անկախության 30-րդ տարեդարձը։

Ուստի, իսկը ժամանակն է կյանքի կոչելու Մեծն Զորավարի պատգամը։

Խոսքս ուղղում եմ բոլոր պատկան մարմիններին, ազատության նահատակներին վայել հուշարձան ունենալու համար աշխատանքները պետք է սկսել հենց այսօր։

Ի՛ գործ....»: