Ասել` մշակույթի գործիչներն օգտագործվում են քարոզարշավում, սխալ է. Արմեն Ամիրյանը` «Ռեինկարնացիա»-ի մասին

Օրերս մեծ աղմուկ բարձրացավ «Ռեինկարնացիա» խմբի շուրջ, քանի որ խումբը ՀՀԿ-ի քարոզարշավի երգն էր կատարում, իսկ «Ֆեյսբուք»-ում գրել էին, թե պետք չէ քաղաքականացնել իրենց կատարումը:

Yerkir.am-ը զրուցեց մշակույթի նախարար Արմեն Ամիրյանի հետ` փորձելով հասկանալ այդ կապակցությամբ նրա կարծիքը: Նախարարը նշեց, որ կուսակցությունները, առհասարակ, հասարակության հայելին են, և մեր հասարակության մեջ ոչ միայն մշակութային գործիչներ կան, երաժիշտներ, «Ռեինկարնացիա», այլ նաև` ինժեներներ, շինարարներ, ճարտարապետներ, բանվորներ ու տաքսու վարորդներ: «Երբ նայում ենք այդ տեսահոլովակը, այնտեղ շատ մարդ կա, պարզապես միայն ճանաչում ենք «Ռեինկարնացիա»-ին, և դա որակել, թե մշակույթի գործիչներն օգտագործվում են քարոզարշավում, սխալ է: Մեր կուսակցության քարոզարշավի տեսահոլովակի մեջ ներկայացված է մեր հանրությունը: Այդ հանրության մեջ մենք մատնանշում ենք այն մարդկանց, ում ճանաչում ենք»,- ասաց Ամիրյանը:

Մեր հարցին` այսինքն` պետք չէ՞ քաղաքականացնել երևույթը, նա պատասխանեց. որ չի կարծում: «Մենք խոսում ենք վաղվա օրվա, մեր պայծառ ապագայի մասին, այն ապագայի, որը տեսնում ենք, խոսում ենք էլ ավելի լավ հայրենիքի մասին, այն մասին, թե ով կարող է ավելի լավ դա անել, եթե ոչ մեր կուսակցությունը: Սա է գաղափարը»,- ասաց Ամիրյանը: