Եթե որևէ մեկին թվում է՝ ընտրությունը հաշտ ու համերաշխ կյանք է, այդպես չէ. Դավիթ Հարությունյան

Կառավարության աշխատակազմի ղեկավար-նախարար Դավիթ Հարությունյանն այսօր խորհրդարանում լրագրողների հետ զրույցում ասաց, որ Ընտրական օրենսգիրքը, ներառյալ` ընտրակարգերը, ընդունվել են խորհրդարանի կողմից, բայց նաև նորմալ համարեց, որ դրանից հետո էլ կարող են լինել դեմ կարծիքներ, այդ թվում` ՀՀԿ-ում: «Նորմալ է, որ կլինեն դեմ կարծիքներ, դա խոսում է այն մասին, որ բազմակարծություն է»,- ասաց նա:

Պատասխանելով դիտարկմանը, թե ռեյտինգային ընտրակարգը շատ հաճախ մարդկանց հանում է միմյանց դեմ, Հարությունյանն ասաց. «Ընտրությունները նրա համար չեն, որ ժողովրդին իրար դեմ հանեն: Կարծում եմ, որ թեկնածուների միջև պայքարը միշտ կարող է առաջացնել որոշակի սրացում: Եթե որևէ մեկին թվում է, որ ընտրությունը հաշտ ու համերաշխ կյանք է, այդպես չէ, ընտրությունների ժամանակ յուրաքանչյուրն է պայքարում, որպեսզի ստանա առավելագույն քվե»:

Արձագանքելով ԱԺ պետաիրավական հանձնաժողովի նախագահ Հովհաննես Սահակյանի այն դիտարկմանը, թե ընտրություններից հետո հնարավոր է վերանայվի ռեյտինգային ընտրակարգը, Հարությունյանը նշեց, որ որևէ բան բացառել չի կարելի, բայց այս պահին, ըստ նրաի, նման հիմք չկա: Նա նաև հորդորեց չօգտագործել «ռեյտինգային» տերմինը, փոխարենն առաջարկեց օգտագործել «տարածքային»-ը, ապա ասաց, որ կարելի է ուսումնասիրել նաև՝ ինչ եզրակացություն է տվել ընտրական համակարգերի վերաբերյալ Վենետիկի հանձնաժողովը:

Անդրադառնալով նրան, որ ՀՀԿ-ի ցուցակում չկա իր անունը, և պատասխանելով հարցին՝ ինչպիսի՞ն եք տեսնում Ձեր քաղաքական ապագան, նա ասաց, որ ընտրություններից հետո պարզ կդառնա` կախված նրանից՝ ինչ կոնֆիգուրացիա կլինի ԱԺ-ում: «Ես նպատակահարմար չեմ համարել իմ աշխատանքը ԱԺ-ում»,- հավելեց Հարությունյանը:

Հարցին՝ հնարավո՞ր է վերադառնա իր նախկին պաշտոնին՝ արդարադատության նախարարի, պատասխանեց, որ ցանկություն չունի: Հարությունյանը նշեց նաև, որ այս պահին քարոզչությամբ չի զբաղվում, բայց անհրաժեշտության դեպքում կմասնակցի: