ՀՅԴ-ն կողմ է Յոլյանի թեկնածությանը

Այսօր ԱԺ նիստում քննարկվում էր ՎՊ նախագահի թեկնածությունը: ՀՀ նախագահը ՎՊ նախագահի պաշտոնում առաջադրել է էներգետիկայի նախկին նախարար Լևոն Յոլյանի թեկնածությունը:

ԱԺ ՀՅԴ խմբակցության ղեկավար Արմեն Ռուստամյանը ելույթ ունեցավ` ասելով, որ պետականաստեղծ ու համակարգաստեղծ կարևոր ընտրություն պետք է կատարի խորհրդարանը` ընտրելով ՎՊ նախագահի, քանի որ դա հիմք է դնելու նոր Սահմանադրության լիարժեք իրականացմանը:

Ըստ նրա` ՎՊ-ն կոչված է լինելու ապահովել իրական հավասարակշռում ու զսպում օրենսդիր ու գործադիր մարմինների միջև` վերաձևակերպվելով Հաշվեքննիչ պալատի: Ռուստամյանը նշեց, որ վերահսկիչ ոլորտը պետք է ղեկավարի այնպիսի մարդ, ով քաջատեղյակ է ոլորտին, աշխատել է այդ ոլորտում:

«Մենք հիմա մի թեկնածուի մասին ենք խոսում, ով զերծ է եղել ուղղակի թիրախավորումներից, ինչը դրական հիմք է ստեղծում` ասելու, որ պարոն Յոլյանը հենց այդ ճիշտ անձնավորությունն է, ով, հասկանալով ոլորտի նրբությունները, առավելագույնս կօգտագործի իր փորձը, որ ունենանք լուրջ Հաշվեքննիչ պալատ»,- ասաց պատգամավորը:

Նրա խոսքով` ՎՊ-ն այն մարմինն է, որը «պաշտոնապես կասկածելու» իրավունք ունի, ու թեև դատախազական մարմին չէ, բայց նրա բարձրացրած եզրակացությունները պարտադիր պետք է ուսումնասիրվեն, և եթե կան քրեական խնդիրներ, դրանով պետք է զբաղվեն իրավապահ մարմինները: