Կրեմլը չի բացառում Հունգարիայի միանալը Nord Stream եւ «Թուրքական հոսք» գազատարերին

Կրեմլում չեն բացառում Հունգարիայի միանալը Nord Stream եւ «Թուրքական հոսք» գազատարերին։ Այս մասին հայտարարել է Ռուսաստանի նախագահի օգնական Յուրի Ուշակովը։

«Չի բացառվում, որ ապագայում հունգարացի մեր գործընկերները կարող են միանալ «Հյուսիսային հոսք» եւ «Թուրքական հոսք» գազատարերի միջոցով էներգակիրների մատակարարման՝ «Գազպրոմ»–ի կողմից մշակվող նոր ուղիներին», – Ուշակովի խոսքերն է մեջբերում ՌԻԱ Նովոստի–ն։

Ռուսաստանի նախագահի օգնականը նաեւ նշել է, որ Հունգարիան ակտիվորեն մասնակցում է Ռուսաստանի տարածքում, մասնավորապես՝ Արեւմտյան Սիբիրում ածխաջրածնային պաշարների արդյունահանմանը։

Չորեքշաբթի Ռուսաստանի Դաշնային Ժողովի Դաշնության Խորհուրդը վավերացրել է «Թուրքական հոսքի» շուրջ համաձայնագիրը, որը գործելու է 30 տարի՝ հետագա երկարացման իրավունքով։ Դրանցի առաջ հայտնի էր դարձել, որ «Թուրքական հոսքի» շինարարության վրա «Գազպրոմ»–ը 2017թվականին նախատեսում է ծախսել շուրջ 42 միլիարդ ռուբլի։