Թուրքիայում հրճված են՝ Ֆրանսիայում այսուհետ կկարողանան հրապարակավ հերքել Հայոց ցեղասպանությունը

Թուրքական բոլոր ԶԼՄ-ներն արդեն հասցրել են որպես թեժ լուր ներկայացնել Ֆրանսիայի Սահմանադրական խորհրդի որոշումը, համաձայն որի` մերժվել են երկրի Ազգային ժողովի կողմից կառավարության առաջարկով 2016-ի դեկտեմբերին ընդունված «Հավասարություն և քաղաքացիություն» օրենքի մի շարք դրույթներ:

Նշենք, որ Սահմանադրական խորհուրդը հակասահմանադրական է համարել մարդկության դեմ իրագործված հանցագործությունների ժխտման համար քրեական պատասխանատվություն սահմանելը` դա համարելով կատարված իրադարձությունների մասին կարծիք հայտնելու ազատությանը խոչընդոտում: Այդ որոշման շրջանակներում Հայոց ցեղասպանության ժխտումը ևս չի քրեականացվի:

Haberler-ն այս որոշումը շտապել է որակել «Թուրքիայի կողմից իրավական հաղթանակ»: Հոդվածի հեղինակը նաև չի թաքցրել իր ոգևորությունն այն  մասին, որ որոշումը թույլ կտա Ֆրանսիայում այսուհետ հրապարակավ հերքել «1915 թվականի մասին հայկական պնդումները»:

Կայքը հիշեցնում է նաև, որ, նշյալ օրենքի համաձայն,  մարդկության դեմ գործված հանցանքների հերքումը որակվում էր իբրև «ատելության հիման վրա կատարված հանցագործություն»: Օրենքի սահմաններում մեղավոր ճանաչված անձը պետք է դատապարտվեր 1 տարվա ազատազրկման և տուգանվել 40.000 եվրոյով: