Երեք ամիս առաջ գործարկված պրոբացիոն ծառայությունը մոտ 3000 շահառու ունի. նախարար

ՀՀ արդարադատության նախարարության` 2016-ին կատարած կարևոր աշխատանքներից է պրոբացիոն համակարգի ներդրումը: Այս մասին տարեվերջյան ամփոփիչ ասուլիսի ժամանակ լրագրողներին հայտնեց ՀՀ արդարադատության նախարար Արփինե Հովհաննիսյանը:

Նրա խոսքով՝ դեկտեմբերի 19-ի դրությամբ պրոբացիոն պետական ծառայությունում հաշվառված է 2813 դատապարտյալ, որոնց նկատմամբ նշանակվել է 1783 պատիժ, որից 1411՝ տուգանք, 199-ը՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկում, իսկ 173-ը՝ հանրային աշխատանքներ: Պրոբացիոն ծառայության շահառուներից վերահսկողություն է իրականացվում 1206-ի նկատմամբ, որոնցից 1135-ը պատիժը պայմանականորեն չկիրառված դատապարտյալներն են, 62-ը՝ պատժից պայմանական վաղաժամկետ ազատված, 9-ը` պատժի հետաձգումով:

Նշենք, որ պրոբացիոն ծառայությունն իրականացվում է ազատությունից զրկելու հետ չկապված, որոնցից են տուգանքը, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը, հանրային աշխատանքները և այլն: Պրոբացիոն պետական ծառայությունը գործում է այս տարվա սեպտեմբերի 1-ից: